Beynəlxalq Telekommunikasiya İttifaqı peyk rabitəsi üzrə simpozium keçirib
Bakı, 3 oktyabr, AZƏRTAC
Beynəlxalq Telekommunikasiya İttifaqı (ITU) Vyetnamın Dananq şəhərində peyk rabitəsi üzrə simpozium və “Spektr-orbit resurslarından səmərəli istifadə” adlı praktikum seminar keçirib.
AZƏRTAC ITU-nun saytına istinadla xəbər verir ki, simpozium Asiya-Sakit okean regionunda əməkdaşlığın möhkəmləndirilməsinə, direktiv və tənzimləyici orqanlar, eləcə də peyk xidmətləri, peyklə əlaqədar normativ müddəaların hazırlanması ilə məşğul olan sahə arasında əməkdaşlığın qurulması məqsədi daşıyıb.
Müzakirələr beynəlxalq normativ müddəaların yenilənməsi və noyabrın 2-dən 27-dək keçiriləcək Dünya radiorabitə konfransına hazırlıq, peyk rabitəsinin siyasi və normativ-hüquqi bazası, o cümlədən müxtəlif ölkələrdə peyk rabitəsinə və radioyayım xidmətlərinə aid mövcud praktika, peyk və peyk texnologiyaları bazarında tendensiyalar, eləcə də sahə üçün imkanlar mövzusu ətrafında aparılıb.
Forum Asiya-Sakit okean regionunun yüksəkvəzifəli hökumət, eləcə də akademik təşkilatlar, milli peyk xidməti tədarükçüləri və peyk operatorları nümayəndələri üçün nəzərdə tutulub.
“Spektr və orbit resurslarından istifadə getdikcə çətinləşir. Çünki bu resurslar üzv dövlətlər və peyk şirkətləri üçün ən vacib resurslardan biridir. BTİ-nin Dananqda keçirilən peyk rabitəsi üzrə beynəlxalq simpoziumu ondan səmərəli istifadəyə kömək üçün əsas rol oynayır”, - ITU-nun baş katibi Houlin Çjao bildirib.
Vyetnamın radiotezliklərdən istifadənin idarəetməsini həyata keçirən orqanının (ARFM) dəvəti ilə reallaşan tədbirlərdə 20 ölkənin 137 nümayəndəsi iştirak edib.
Bölmənin digər xəbərləri
