BMU ilə “BERC Group” arasında əməkdaşlıq müqaviləsi imzalanıb
Bakı, 5 iyun, AZƏRTAC
Bakı Mühəndislik Universiteti ilə “BERC Group” MMC arasında əməkdaşlıq və birgə fəaliyyəti nəzərdə tutan müqavilə imzalanıb.
Universitetdən AZƏRTAC-a bildirilib ki, rektor Yaqub Piriyev və “BERC Group”un direktoru Ruslan Məmmədov tərəfindən imzalanan sənəd ali təhsil ocağı ilə biznes sektoru arasında əməkdaşlığın inkişaf etdirilməsini nəzərdə tutur. Müqavilədən irəli gələn məqsədlər sırasında elmi-texnoloji yeniliklərin sahibkarlığın inkişafına tətbiqi, professor-müəllim heyəti və tələbələr arasında biznes sektoruna aid məlumatlılığın gücləndirilməsi, yeni tətbiqlərin yayılmasının təmini, bilik və bacarıqların dövrün şərtlərinə uyğun davamlı gücləndirilməsi, habelə sosial məsuliyyət, innovativ yönümlü layihələrin birgə icrası kimi vacib məsələlər yer alır.
Rektor Yaqub Piriyev universitetlə iş dünyası arasında əməkdaşlığın daha da inkişaf etdirilməsi baxımından müqavilənin önəminə diqqət çəkib. BMU-da bu istiqamətdə görülən işlərə, mövcud imkanlara, eləcə də universitet Texnoparkında gerçəkləşdirilən layihələrə toxunan rektor birgə fəaliyyətin ümumi işə töhfə verəcəyinə inandığını deyib. Təhsilin bütün pillələri üzrə Azərbaycan və ingilis dillərində kadr hazırlığı həyata keçirən BMU-nun əsas hədəfləri, o cümlədən yeniliklər barədə də məlumat verən Yaqub Piriyev birgə əməkdaşlıqdan irəli gələcək məsələlərlə bağlı fikirlərini bölüşüb.
Sonra çıxış edən “BERC Group”un həmtəsisçisi Kənan Ağayev BMU ilə əlaqələrin qurulmasına xüsusi önəm verdiklərini deyib. İmzalanan sənədin universitetlə biznes sektoru arasında əməkdaşlığın inkişafında mühüm rol oynayacağına əminliyini ifadə edən Kənan Ağayev ixtisaslaşmış biznes xidmətləri ekosistemi quran şirkət haqqında geniş məlumat verib. Bildirib ki, “BERC Group”un qarşısına qoyduğu məqsədlərdən biri məhz iş dünyası - universitet platformasının gücləndirilməsidir. Biznes subyektləri ilə akademik sektorun potensialından qarşılıqlı bəhrələnməkdə aparıcı körpü rolu oynayan şirkət 200-dən çox xidmət təklif etməkdədir.
Görüşdə aparılan müzakirələr zamanı müqavilədə yer alan məsələlər - tələbə startaplarının dəstəklənməsi, kiçik və orta sahibkarlığın inkişafına töhfə verən birgə tədbirlərin, təlimlərin təşkili, tələbələrin təcrübəyə cəlbi, elmi-tədqiqat təcrübəsinə dəstək, ortaq layihələrin, konfransların gerçəkləşdirilməsi, karyera ilə bağlı layihələrin icrası və s. nəzərdən keçirilib.
Tədbirdə, eyni zamanda, BMU Texnoparkı ilə bağlı təqdimat edilib.
Bölmənin digər xəbərləri
