Bolqarıstan, Rumıniya, Yunanıstan və Serbiya Avropa İttifaqının genişlənməsini dəstəkləyirlər

30.03.2019 [20:20]
Çap et
A⁺ A^-

Buxarest, 30 mart, AZƏRTAC

Rumıniyanın, Yunanıstanın, Bolqarıstanın Baş nazirləri və Serbiyanın prezidenti Avropa İttifaqının gələcəkdə genişlənməsini dəstəkləyirlər.

AZƏRTAC xəbər verir ki, bu barədə Rumıniyanın Snaqov şəhərində keçirilən dördtərəfli görüşün yekunlarına dair bəyanatda bildirilir. Sənəddə deyilir ki, güclü, birgə, vahid Avropa İttifaqın hazırkı və gələcək üzv dövlətlərinin maraqlarına cavab verir.

Tədbir iştirakçıları Bolqarıstan ilə Şimali Makedoniya arasında dostluq və əməkdaşlıq müqaviləsinin, habelə Yunanıstan ilə Şimali Makedoniya arasında Prespa sazişinin imzalanmasını alqışlayıblar. Rumıniya, Bolqarıstan və Yunanıstan Serbiyanın Avropa İttifaqına daxil olmasını dəstəklədiklərini bildiriblər.

Sənədi Rumıniyanın Baş naziri Viorika Dançila, Bolqarıstanın Baş naziri Boyko Borisov, Yunanıstanın Baş naziri Aleksis Tsipras və Serbiyanın prezidenti Aleksandr Vuçiç imzalayıblar.

İqbal Hacıyev

AZƏRTAC-ın xüsusi müxbiri

Buxarest