Britaniya Livandakı səfirliyinin əməkdaşlarının bir hissəsini təxliyə edir
Bakı, 6 noyabr, AZƏRTAC
Böyük Britaniya Livandakı diplomatik nümayəndəliyinin əməkdaşlarının bir hissəsini müvəqqəti olaraq ölkədən çıxarır.
AZƏRTAC xəbər verir ki, bu barədə Birləşmiş Krallığın Xarici İşlər Nazirliyinin məlumatında deyilir.
Məlumata görə, Böyük Britaniya, həmçinin öz vətəndaşlarını Livana səfər etməməyə, hazırda orada olan britaniyalıları isə təcili olaraq həmin ölkəni tərk etməyə çağırıb.
Xatırladaq ki, oktyabrın 7-də HƏMAS hərəkatının silahlı qanadı olan “İzzəddin əl-Kassam” briqadasının İsrailin nəzarətində olan ərazilərə hücumlarından sonra Yaxın Şərqdə vəziyyət gərginləşib. İsrail tərəfi HƏMAS-ın hücumuna cavab olaraq Qəzza sektorunda hərbi əməliyyatlara başlayıb.
Eyni zamanda, “Hizbullah” hərəkatının Livan ərazisdindən İsrail ordusunun mövqelərini atəşə tutması Beyrutla Təl-Əviv arasında münasibətləri gərginləşdirib. SAXAL Livandakı bəzi sərhədyanı yaşayış məntəqələrinə və “Hizbullah” hərəkatının mövqelərinə zərbələr endirib.
Bölmənin digər xəbərləri
