Britaniyada əcnəbilər üçün səhiyyə xidmətləri pullu ola bilər
Bakı, 4 iyul (AZƏRTAC). Birləşmiş Krallığın Səhiyyə Nazirliyi yeni sənəd qəbul etmişdir.
Britaniyanın bir sıra kütləvi informasiya vasitələrində dərc olunmuş sənəddə göstərilir ki, Böyük Britaniya bu ölkəyə beş ildən az müddətə gələn əcnəbilər üçün səhiyyə xidmətlərini pullu edə bilər.
Hazırda bu ölkədə həm yerli vətəndaşlar, həm də işgüzar vizalar əsasında uzun müddət burada yaşayan əcnəbilər üçün tibbi xidmətlər, stomatologiya müstəsna olmaqla, pulsuzdur.
Milli səhiyyə sisteminin xərclərini azaltmaq məqsəd ilə hazırlanmış sənəddə göstərilir ki, hökumət tibbi turizmdən yaxa qurtarmaq üçün əcnəbilərin tibbi xidmətlərdən istifadə etməsinə görə ödəniş tətbiq etməlidir.
Məbləği ildə azı 200 funt sterlinq (300 dollardan çox) olacaq bu rüsumu ödəməkdən yalnız Avropa İttifaqının üzvü olan ölkələrin vətəndaşları azad ediləcəklər.
Səhiyyə naziri Ceremi Hant bu sənədin dərc edilməsi ilə əlaqədar demişdir: “Səmimi olmalıyıq: bu, beynəlxalq səhiyyə sistemi deyil, milli səhiyyə sistemidir. Mən sui-istifadə hallarının aradan qaldırılması və sistemin lazımınca istifadə edilməməsinə son qoyulması üçün nə mümkündürsə, etmək niyyətindəyəm”. Nazirlər kabineti müstəqil audit yoxlaması aparmaq və əcnəbilərə tibbi xidmətlər görə rüsumun dəqiq məbləğini müəyyən etmək niyyətindədir. Gözlənildiyinə görə, auditin ilk nəticələri sentyabr ayında məlum olacaqdır.
Səhiyyə Nazirliyi xatırladır ki, Böyük Britaniyada səhiyyə sistemi dünyada ən yaxşı sistemlərdən biridir və bu ölkənin vətəndaşları üçün pulsuz olaraq qalır.
Bununla bərabər, ilkin hesablamalara görə, tibbi turizmin ölkəyə vurduğu ziyanın məbləği ildə 200 milyon funt sterlinq (305 milyon dollar) təşkil edir.
Səhiyyə Nazirliyi bir məqamı dəqiqləşdirərək bildirir ki, Britaniyada tibbi yardım göstərilməsində heç kəsə rəd cavabı verilə bilməz. Yoluxucu və cinsi yolla keçən xəstəliklərin müalicəsi isə əvvəlki kimi pulsuz olacaqdır.
Bu təklifin gerçəkləşməsi baş nazir Devid Kemeron tərəfindən həyata keçirilən miqrasiya islahatlarının tərkib hissəsi olacaqdır.
Bölmənin digər xəbərləri
