Bu il elektron xidmətlərin sayı 387-yə çatıb
Bakı, 15 dekabr, AZƏRTAC
Bu il dövlət qurumlarının həm öz internet səhifələrində, həm də "Elektron hökumət" portalında təqdim etdikləri elektron xidmətlərin sayı xeyli artıb. Hazırda "Elektron hökumət" portalı üzərindən xidmət təqdim edən qurumların sayı 48, elektron xidmətlərin sayı isə 387-yə çatıb. Portaldakı xidmətlərin kəmiyyət və keyfiyyət göstəricilərinin yüksəldilməsi nəticəsində istifadəçi sayı 1 milyon 67 min 420, e-imza sertifikatlarından faydalananların sayı isə 27 min 536-dır.
Rabitə və Yüksək Texnologiyalar Nazirliyinin Məlumat Hesablama Mərkəzi tərəfindən 2015-ci ildə "Elektron hökumət" quruculuğu istiqamətində həyata keçiriləcək tədbirlər üzrə plan hazırlanıb.
Mərkəzdən AZƏRTAC-a bildirilib ki, plana əsasən, treninq və seminarların, görüşlərin, maarifləndirici mühazirələrin təşkili və s. nəzərdə tutulur. "Elektron hökumət" portalı və e-imzanın populyarlığının artırılması məqsədilə kütləvi informasiya vasitələri ilə sıx əməkdaşlıq edilməsi planlaşdırılır. Bununla yanaşı bir sıra sosial xarakterli tədbirlər də həyata keçiriləcək.
Bölmənin digər xəbərləri
