Bu il Pedaqoji Universitetə beş nəfər müsabiqədənkənar qaydada qəbul olunub
Bakı, 30 sentyabr, AZƏRTAC
2025-2026-cı tədris ili üzrə ali təhsil müəssisələrinin bakalavriat səviyyəsinə qəbulun yekun nəticələrinə əsasən 5 nəfər Azərbaycan Dövlət Pedaqoji Universitetinə (ADPU) müsabiqədənkənar qaydada qəbul olunub. Qəbul olunanlardan 1 nəfəri respublika fənn olimpiadalarındakı uğuruna, 4 nəfəri isə beynəlxalq idman yarışlarında əldə etdikləri yüksək nəticələrə görə bu hüququ əldə ediblər.
Bu barədə AZƏRTAC-a ADPU-dan məlumat verilib.
Bu tələbələri yaxından tanıyaq:
Şövkət Rövşən oğlu Seyidəliyev 2008-ci ildə Xaçmaz rayonunda dünyaya gəlib. C.Cabbarlı adına Xaçmaz şəhər 6 nömrəli məktəbin 2025-ci il məzunudur. 2023-cü ildə respublika olimpiadasının final turunda coğrafiya fənnindən IX sinif üzrə müsabiqədə III yeri tutub. O, ADPU-nun Tarix və coğrafiya fakültəsinə tarix və coğrafiya müəllimliyi ixtisası üzrə müsabiqədənkənar qəbul olunub.
Kamran Turab oğlu Zeynalov 1992-ci ildə Sabirabad şəhərində anadan olub. 2008-ci ildən paraatıcılıq idman növü ilə məşğuldur. 2013-cü il İspaniyanın Alekante şəhərində keçirilmiş Avropa çempionatında 10 metr məsafədə komanda yarışında III yerə, 2014-cü il İngiltərədə dünya kubokunda fərdi yarışda I yerə çıxıb. 2014-cü il Almaniyada keçirilmiş dünya çempionatında komanda yarışlarında gümüş və bürünc, 2015-ci ildə İngiltərədə dünya kubokunda fərdi yarışlarda gümüş medal, 2019-cu ildə Tbilisidə olimpiyaçılar arasında dünya kubokunda bürünc medal qazanıb. 2021-ci ildə Serbiyada Qran-Pri yarışlarını 10 və 50 metr məsafəyə atışlarda qızıl və bürünc, 2023-cü ildə Hanoverdə Dünya kubokunu 3 gümüş, 1 bürünc medalla başa vurub. 2023-cu ildə Perunun Lima şəhərində dünya çempionatında fərdi yarışlarda I, qarışıq komanda yarışlarında II, 2024-cü ildə Serbiyada keçirilmiş Qran-Pridə fərdi yarışlarda II yerə layiq görülüb. Tokio və Paris Yay Paralimpiya Oyunlarının iştirakçısıdır. Müsabiqədənkənar qaydada ADPU-nun İncəsənət və fiziki tərbiyə fakültəsinə qəbul olunub.
Ceyhun İlqar oğlu İsazadə 2008-ci ildə Şirvan şəhərində anadan olub. Uşaqlıqdan güləşlə məşğul olmağa başlayıb. 2018-ci ildə Olimpiya İdman Liseyinin keçirdiyi birincilikdə 29 kiloqram çəki dərəcəsi üzrə bürünc medal qazanıb. 2024-cü ildə şəhər birinciliyində 55 kiloqram çəki dərəcəsində gümüş medal qazanıb. 2023-cü ildə Qırğızıstanın paytaxtı Bişkekdə keçirilən yunan-Roma və sərbəst güləş üzrə dünya çempionatında 51 kiloqram çəki dərəcəsi üzrə gümüş medal qazanıb. Müsabiqədənkənar qaydada ADPU-nun İncəsənət və fiziki tərbiyə fakültəsinə qəbul olunub.
Xanhüseyn Elman oğlu Abuşov 2002-ci ildə Bakıda anadan olub. 2018-ci ildə Nizami rayonunda yerləşən idman məktəbindən məzun olub. 2021-ci ildə isə Rusiyanın paytaxtı Moskva şəhərində Sosial Pedaqoji Universitetin Fiziki tərbiyə müəllimliyi fakültəsinə qəbul olunub, 2025-ci ildə təhsilini uğurla başa vurub. Uşaq vaxtlarından yunan-Roma güləşi ilə məşğul olmağa başlayıb. 2016-cı ildə keçirilmiş Azərbaycan birinciliyində yeniyetmələr arasında gümüş medal qazanıb. Həmin il İranda keçirilmiş ənənəvi “İman Yadigar” beynəlxalq turnirində fərdi yarışlarda 54 kiloqram çəki dərəcəsində qızıl, komanda yarışında isə bürünc medal qazanıb. 2020-ci ildə İstanbulda keçirilmiş deflimpiya üzrə dünya çempionatında gənclər arasında gümüş, böyüklər arasında isə bürünc medal qazanaraq Rio-de-Janeyro Olimpiadasına vəsiqə qazanıb. 2021-ci ildə Türkiyənin İstanbul şəhərində eşitmə əngəllilər arasında keçirilmiş yunan-Roma güləşi üzrə dünya çempionatında 67 kiloqram çəki dərəcəsində çıxış edib, gənclər arasında gümüş, böyüklər arasında bürünc medal qazanıb. 2022-ci ildə Avropa çempionu olub. 2023-cü ildə Bişkekdə dünya çempionatında yenidən gümüş medal qazanaraq Tokio Olimpiadasında vəsiqə qazanıb. Müsabiqədənkənar qaydada ADPU-nun İncəsənət və fiziki tərbiyə fakültəsinə qəbul olunub.
İsmayıl Zülfü oğlu Muradov Sumqayıt şəhərində anadan olub. Orta təhsilini Sağlamlıq imkanları məhdud uşaqlar üçün 5 nömrəli Respublika xüsusi internat məktəbində alıb. Milli Paralimpiya Komitəsinin paracüdo idman növü üzrə komandasının əsas üzvlərindəndir. Ölkədaxili və beynəlxalq yarışlarda uğurla iştirak edib. 2022-ci ildə İtaliyanın Kalyari şəhərində keçirilmiş Avropa çempionatında J1 kateqoriyası üzrə 60 kiloqram çəki dərəcəsində bürünc medal qazanıb. Həmin ildə paracüdo üzrə kişilərdən ibarət Azərbaycan millisinin tərkibində Bakıda təşkil olunan dünya çempionatının qalibi olub. 2023-cü ildə Niderlandın Roterrdam şəhərində keçirilmiş Avropa çempionatının bürünc medalçısıdır. Böyük Britaniyanın Birminhem şəhərində keçirilmiş IBSA Dünya Oyunlarının iştirakçısıdır. O, müsabiqədənkənar qaydada ADPU-nun İncəsənət və fiziki tərbiyə fakültəsinə qəbul olunub.
Bölmənin digər xəbərləri
