Bakı, 30 oktyabr (AZƏRTAC). Həmvətənimiz, hüquq elmləri doktoru, Ukrayna Milli Aviasiya Universitetinin professoru, Ukraynanın Əməkdar Təhsil İşçisi Arif QULİYEVİN “Bu, seçkidir, saxtakarlıq deyil!” sərlövhəli məqaləsi AZƏRTAC-a daxil olmuşdur. Həmin məqaləni təqdim edirik.

Builki seçkilərin nəticələri bir daha göstərdi ki, azərbaycanlılar İlham Əliyevin ötən iki prezidentlik müddəti ərzində onun işindən razıdırlar. Bu gün Azərbaycan elə məkandır ki, orada yaşamaq və işləmək insanlara xoşdur. Ona görə də bu dəfə hər bir şüurlu Azərbaycan seçicisi İlham Əliyevə səs verməklə ilk növbədə sabitliyə, təhlükəsizliyə və firavan gələcəyə səs vermişdir. Prezident İlham Əliyev bu etimadı Azərbaycan naminə, öz xalqı naminə yorulmaz əməyi sayəsində, ölkənin perspektivdəki prioritetləri barədə təsəvvürü, qətiyyəti, güclü siyasi iradəsi sayəsində qazanmışdır.

Şübhəsiz, hər hansı oxşar proseslərdə olduğu kimi, İlham Əliyevin qələbəsinə də sevinənlərlə bərabər, bundan kədərlənənlər də var. Prezident İlham Əliyev dünyada çox populyar, beynəlxalq dairələrdə yüksək imic sahibi olan uğurlu və praqmatik siyasətçidir. İlham Əliyevin dövlət idarəçiliyində nümayiş etdirdiyi səviyyə Azərbaycanın səmərəli inkişafı və dünya ölkələri arasında öz mövqeyini möhkəmlətməsi üçün əlverişli şərait yaradır. Mübaliğəsiz demək olar ki, bu gün Azərbaycan dünya miqyaslı dövlətə çevrilir. Bu da İlham Əliyevin rəhbərliyi ilə Azərbaycanın mükəmməl xarici siyasət strategiyasının nəticəsidir.

İlham Əliyevin qələbəsi xalqı sevindirir, seçkilərin nəticələrindən narazı olan rəqiblər isə qalibi ən müxtəlif maxinasiya və saxtakarlıqlarda, KİV-lərdən imtiyazlı şəkildə istifadə etməkdə və başqa əməllərdə ittiham edirlər. Lakin aşkardır ki, əsas məsələ guya İlham Əliyevin üzdəniraq “inzibati resurs”dan istifadə etməsi ilə deyil, onun opponentlərinin elektoral bazasının açıq-aydın məhdudluğu ilə bağlıdır.

Seçkilərin guya saxtalaşdırılması barədə hər küncdə-bucaqda qara-qışqırıq salan müxalifət heç özünün hipotetik planını və ya hər hansı diqqətəlayiq konsepsiyasını da təqdim etməmişdir. Müxalifət seçkilərdə qalib gələcəyi təqdirdə seçkilərdən sonra nə ilə məşğul olacağını aydın təsəvvür etmirdi. Seçkilərin gedişini müxalifətin zərərinə müəyyən edən də bu oldu, çünki məlum olduğu kimi, heç nə təklif etməyən kəs uduzur.

Əslində seçkilərin saxtalaşdırılması barədə danışmaq üçün müxalifətin heç bir əsası yoxdur. Ona görə ki, səsvermə günündə MSK-ya heç bir şikayət daxil olmamışdır. Onlar isə utanıb qızarmadan, özlərinin beş faiz səs toplayaraq uduzmasını qalib gəlmiş namizədin topladığı səksən beş faiz səslə müqayisə edirlər.

Üstəlik, Azərbaycanda seçkilərin guya bu ölkənin ATƏT üzvü kimi öhdəliklərinə tam müvafiq olmadığını hesab edən ABŞ Dövlət Departamentinin mövqeyi də ədalətsizdir. Bu fikir gerçəkliyi əks etdirmir. Bu yalnız ona dəlalət edir ki, ATƏT-in Demokratik Təsisatlar və İnsan Haqları Bürosu (DTİHB) və ABŞ demokratiya və insan hüquqları məsələlərini inhisarlaşdırmışlar və onlardan özlərinin lazım bildiyi kimi (məsələn Ermənistan-Azərbaycan, Dağlıq Qarabağ münaqişəsinin tənzimlənməsinə dair ATƏT-in Minsk Qrupunun həmsədri kimi) istifadə edirlər, özü də təkcə Azərbaycana münasibətdə yox...

Azərbaycanda Prezident seçkiləri dünyanın başqa qabaqcıl ölkələrindəki seçkilərdən heç də aşağı səviyyədə keçməmiş, aşkarlıq və demokratiya məsələlərində isə hətta onlardan üstün olmuşdur. Buna görə də aydındır ki, ABŞ-ın və DTİHB-in rəyləri tamamilə subyektivdir və anlaşılmazlığa səbəb olur. Üstəlik, ABŞ-ın adi vətəndaşları, konqresmenlər, senatorlar və digər seçkili orqanların nümayəndələri tərəfindən bu seçkilərə verilən qiymət Dövlət Departamentinin qərəzli rəyi ilə əsla üst-üstə düşmür. Azərbaycan xalqının bu seçkilərdə öz iradəsini nümayiş etdirməsini müxtəlif beynəlxalq müşahidə missiyaları, ekspertlər, Avropa və Amerika strukturlarının keçirdiyi exit-pollar da təsdiq etmişdir. DTİHB-in və ABŞ-ın mövqeyi isə həm bu və ya digər namizədə səs vermiş vətəndaşların öz iradələrini ifadə etmələrinə hörmətsizlik, həm də demokratiya prinsiplərinin tamamilə pozulması deməkdir.

DTİHB-in müşahidə missiyasının tərkibinə daxil olan nümayəndələrin əksəriyyəti seçki prosesinin müşahidə edilməsi sahəsində kifayət qədər təcrübəsi olmayan adamlar idi. Digər tərəfdən, seçkiləri dünyanın 100 ölkəsindən, 50 beynəlxalq və qeyri-hökumət təşkilatından 1300 beynəlxalq müşahidəçi - DTİHB-dən fərqli olaraq bu sahənin ekspertləri olan adamlar izləyirdi. Onların arasında MDB Parlament Assambleyasının, GÜAM-ın, İslam Əməkdaşlıq Təşkilatının, Qara Dəniz İqtisadi Əməkdaşlıq Təşkilatının nümayəndələri vardı. Məhz həmin təşkilatların nümayəndələri Azərbaycanda Prezident seçkilərinin yüksək demokratiya və şəffaflıq şəraitində keçdiyini qeyd etmişlər. Məsələn, Avropa Parlamenti və AŞPA bu seçkilərdə səsvermənin ədalətli və Azərbaycan qanunvericiliyinə uyğun olduğunu etiraf etmişlər.

Bütün bunlara əsasən belə qənaətə gəlmək olar ki, müşahidə missiyasının tərkibinə seçki prosesi barədə məlumatı olmayan insanların daxil edilməsi qərəzli şəkildə olmuşdur. Şübhəsiz, buna səbəb müəyyən dairələrin çoxdan hazırlanmış rəyini ictimaiyyətə zorla qəbul etdirmək niyyəti olmuşdur.

Bir fakt aşkardır ki, seçkilərdə İlham Əliyevə verilmiş səslər onun ölkənin dinamik inkişafına yönəlmiş fəaliyyət kursunun seçicilər tərəfindən dəstəklənməsi, milli maraqların etibarlı şəkildə müdafiə ediləcəyinə əminlik deməkdir. Bu gün Azərbaycanda elə bir sahə yoxdur ki, son illərdə orada artım müşahidə edilməsin. Ölkədə iqtisadi inkişaf və ictimai-siyasi vəziyyətin yaxşılaşması ilə bərabər, xarici siyasətdə də mühüm uğurlar qazanıldığını qeyd etmək olar, bu uğurlar Azərbaycanın nüfuzunu və dünya arenasında onun imicini yüksəldir.

Skeptiklər hələ İlham Əliyevin birinci prezidentliyindən əvvəl belə bir fikir söyləyirdilər ki, yeni seçilmiş prezident ölkəni atası kimi uğurla idarə edə bilməyəcək, lakin İlham Əliyev ölkəyə rəhbərliyinin elə ilk iki ili ərzində bunun əksini sübut etdi. O, həm ümummilli lider Heydər Əliyevin siyasətini uğurla davam etdirdi, həm də özünün müstəqil surətdə, müdrik və düzgün qərarlar qəbul etməyi bacaran real siyasətçi olduğunu təsdiq etdi.

Əlbəttə, Azərbaycan Prezidenti İlham Əliyevin 10 illik prezidentliyi dövründə gördüyü işlərin böyük həcmini rəqəmlər və faktlar əsasında nümayiş etdirmək olardı, lakin bu da skeptikləri və qərəzli bədxahları qane etməzdi. Belə olan halda onlara yalnız bir məsləhət vermək olar - ətraflarına nəzər salsınlar. Əlbəttə, əgər desəm ki, İlham Əliyev Azərbaycanı keyfiyyətcə daha yüksək inkişaf səviyyəsinə çatdırmışdır, orijinallıq etmiş olmaram, lakin bu həqiqətən belədir. Fikir verin, bu gün ölkədə tikinti, turizm kimi sahələr yüksək sürətlə inkişaf edir, əhalinin rifahı daha da yaxşılaşır, Azərbaycanın həm Avropada, həm də bütün dünyada tanınması üçün iri layihələr həyata keçirilir. Hələ ölkəmizdə nə qədər beynəlxalq tədbirlər keçirilir! Məsələn, “Eurovision” mahnı müsabiqəsində Azərbaycanın qələbəsi, 2015-ci ildə Birinci Avropa Oyunlarının ölkəmizdə keçirilməsi şəksiz nailiyyətlərdir. Demək olar ki, hər ay Bakıda beynəlxalq forumlar - iqtisadi, mədəni forumlar, sivilizasiyaların dialoquna dair tədbirlər keçirilir, regional əhəmiyyətli siyasi məsələlər müzakirə edilir.

Bu gün Azərbaycan dünya xəritəsində sadə bir nöqtə yox, haqlı olaraq fəxr etməyə dəyəsi firavan ölkədir.