Cari ilin II rübündə Gürcüstanda işsizlik səviyyəsi 22,1 faizə yüksəlib
Tbilisi, 21 avqust, AZƏRTAC
Gürcüstanda işsizliyin səviyyəsinin cari ilin ikinci yarısında da artması pandemiya ilə əlaqədar tətbiq olunan qadağalarla əlaqədardır.
AZƏRTAC xəbər verir ki, bu sözləri jurnalistlərə açıqlamasında Gürcüstanın iqtisadiyyat naziri Natia Turnava söyləyib.
Onun sözlərinə görə, 2021-ci ilin ikinci rübündə işçi qüvvəsinin aktivlik səviyyəsi 50,3 faizdən 51,4 faizə, işçi qüvvəsi isə 44,1 min artıb. Bu çox müsbət dinamikadır və yaxın vaxtlar daha yaxşı nəticələr əldə olunacaq.
Qeyd edək ki, bu ilin II rübündə Gürcüstanda işsizlik səviyyəsi 22,1 faiz olub. Ölkənin Milli Statistika İdarəsindən bildirilib ki, bu da illik müqayisədə 3,8 faiz çoxdur.
Bildirilib ki, cari ilin aprel-iyunda şəhərlərdə işsizlik 24,1 faiz, (+2,3 faiz), kənd yerlərində isə 19 faiz (+6,2) olub.
Kişilər arasında bu göstərici illik müqayisədə 5,7 faiz artaraq 24,5 faiz, qadınlar arasında isə 1,2 faiz artaraq 18,9 faiz təşkil edib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
