CARİ İLİN SONUNADƏK AZƏRBAYCANDA 10 MEHMANXANA SERTİFİKAT ALACAQ
Gənclər, İdman və Turizm Nazirliyi mehmanxana təsərrüfatının və turizm-ekskursiya xidmətlərinin sertifikatlaşdırılmasına cari ilin payızından başlamışdır. Bu tədbirlər Azərbaycan Prezidentinin Fərmanına və turizmin inkişafına dair Dövlət proqramının müddəalarına uyğun olaraq həyata keçirilir. Kütləvi informasiya vasitələrinin köməyi ilə müvafiq izahat işi aparılmış, Dünya Turizm Təşkilatının mehmanxana obyektlərinə olan tələblərindən ibarət bukletlər nəşr edilmişdir. Hazırda Azərbaycanda 240 mehmanxana və bu tipli obyekt mövcuddur ki, onların da 37-si Bakıdadır. Sertifikatlaşdırma prosesi 2005-ci ilin sonunadək başa çatdırılacaqdır. Həmin müddətədək hansısa mehmanxana sertifikat almasa, nazirlik ona qarşı sanksiyalar tətbiq edəcəkdir. Bu isə həmin mehmanxananın nüfuzuna xeyli təsir göstərə bilər.
Nazir bildirmişdir ki, bu və ya digər obyektin “ulduzları” müəyyən edildikdən sonra qiymət tarifi də dəqiqləşdiriləcəkdir. Sertifikat almaq üçün ekspert şurasına sənədlərini ilk olaraq “Avropa” mehmanxanası təqdim etmişdir.
Turizm şirkətlərinin, mehmanxanaların, müxtəlif nazirlik nümayəndələrinin iştirak etdikləri konfransda respublika mehmanxana təsərrüfatı assosiasiyasının yaradılması, xidmət heyətinin ixtisasının artırılması, ekskursiyaçıların təhsil səviyyəsinin yüksəldilməsi üçün tədbirlər görülməsinə dair təkliflər də səslənmişdir.
