“CƏNUBİ QAFQAZDA NARKOTİKLƏRƏ NƏZARƏT” PROQRAMININ 5-Cİ MƏRHƏLƏSİNİN İCRASI DAVAM EDİR
AZƏRTAC xəbər verir ki, iyulun 27-də Azərbaycan nümayəndə heyətinin “Cənubi Qafqazda Narkotiklərə Nəzarət” (SCAD) Proqramının 5-ci mərhələsi (hüquq mühafizə orqanları arasında regional əməkdaşlıq) çərçivəsində Fransa və Belçikaya səfəri başlamışdır.
Nümayəndə heyətinə Azərbaycan Respublikasında İnterpolun Milli Mərkəzi Bürosunun rəisi, polis general-mayoru Sahib Mirzəyev, SCAD Proqramının ölkə üzrə rəhbəri Məzahir Əfəndiyev, habelə Daxili İşlər Nazirliyinin, Baş Prokurorluğun nümayəndələri daxildirlər.
Səfərin məqsədi Avropa ölkələrinin bu sahədə qabaqcıl təcrübəsini öyrənmək, hüquq mühafizə orqanları ilə əməkdaşlığı daha da möhkəmləndirmək, təcrübə və məlumat mübadiləsi aparmaqdır.
Avqustun 3-dək davam edəcək səfər çərçivəsində nümayəndə heyətinin İnterpolun Lion şəhərindəki Baş Qərargahında və Belçikanın hüquq mühafizə orqanlarında görüşləri nəzərdə tutulmuşdur.
