Cərrah və qastroenteroloqlar üçün yeni imkan
Bakı, 13 iyun, AZƏRTAC
Əziz Əliyev adına Azərbaycan Dövlət Həkimləri Təkmilləşdirmə İnstitutunda (ADHTİ) rusiyalı mütəxəssislərin iştirakı ilə sentyabrın 21-dən oktyabrın 31-dək yanıqlar, yaralar və yara infeksiyalarının müasir müalicə metodları, o cümlədən qastroenterologiya üzrə kurslar təşkil olunacaq.
Azərbaycan Respublikasının Səhiyyə Nazirliyi ilə Rusiya Federasiyasının Diplomdansonrakı Tibb Akademiyası arasında imzalanmış müqavilə əsasında keçiriləcək kurslara respublikanın dövlət xəstəxanalarında ixtisası üzrə ən azı 3 il çalışan, rus dilini səlis bilən 45 yaşadək həkimlər dəvət olunurlar.
Sənədlər ADHTİ-nin tədris hissəsində iyunun 30-dək qəbul edilir. Kurslarda iştirak etmək üçün diplomun sürəti, internaturanı bitirmək və sertifikasiyadan keçmək barədə şəhadətnamələr, kadrların şəxsi uçot vərəqi, bir ədəd rəngli şəkil (3x4), əmək kitabçasının və şəxsiyyət vəsiqəsinin surəti tələb olunur.
Kursları müvəffəqiyyətlə bitirənlərə Rusiya Federasiyasının Diplomdansonrakı Tibb Akademiyasının sertifikatı veriləcək.
Bölmənin digər xəbərləri
