COP29 daha intensiv beynəlxalq əməkdaşlıq üçün yeni imkanlar açacaq - ŞƏRH
Naxçıvan, 13 noyabr, Nail Əsgərov, AZƏRTAC
COP29-un dünya ilə yanaşı, ətraf mühitin qorunması üçün qlobal səylərin artırılmasının əsas tərəfdarlarından biri kimi ölkəmiz üçün də ciddi ekoloji faydaları olacaq. Bu kontekstdə həm ölkəmizin, həm də dünyanın əsas ekoloji problemlərinə yeni yanaşmalar və əvvəlki proseslərin yenidən nəzərdən keçirilməsi sayəsində müvafiq siyasət yeni müstəviyə yüksələcək. COP29 xarici dövlətlərin və investorların ölkəmizdəki ekoloji texnologiyalara sərmayə qoymasına da şərait yaradacaq.
Bu sözləri AZƏRTAC-ın Naxçıvan bürosuna açıqlamasında Naxçıvan Muxtar Respublikası Dövlət Energetika Xidmətinin rəis müavini Tural Murtuzəliyev deyib.
Energetika Xidmətinin rəis müavini, həmçinin bildirib ki, COP29 daha intensiv beynəlxalq əməkdaşlıq üçün yeni imkanlar açacaq.
“COP29 çərçivəsində Naxçıvan Muxtar Respublikasında da Dövlət Energetika Xidməti tərəfindən təbliğat işləri aparılıb, müvafiq addımlar atılıb. Şəhərimizin tarixi məkanında, 800 yaşlı abidənin (Möminə xatun türbəsi) önündə 8 metrlik təşviqat elementi yerləşdirilib və karbon emissiyasına diqqət çəkmək üçün onun işıqlandırılması alternativ və bərpaolunan enerji ilə təmin edilib. Bu, həm də rəmzi məna daşıyır: 800 il əvvəldən fərqli olaraq, bu gün elektrik enerjisi var, amma karbon emissiyası yoxdur. Bu gün də həmin təşviqat elementi – “COP29 Azerbaijan” yazısı – öz missiyasını yerinə yetirir”, - deyə o əlavə edib.
Dövlət Energetika Xidməti tərəfindən “Yaşıl Enerji Könüllüləri” qrupunun yaradıldığını da deyən Tural Murtuzəliyev bildirib ki, əsas məqsəd yaşıl enerji təbliğatını davamlı aparmaq və yaşıl enerji sahəsindəki son texnologiyaları mənimsəməkdir: “Eyni zamanda, Xidmətin əməkdaşları tərəfindən davamlı infosessiyalar keçirilərək, yaşıl enerji ilə əlaqədar müəyyən maarifləndirmə işləri aparılır. Oktyabrın 11-də muxtar respublikada elektrik enerjisinin istehsalında karbon emissiyası 1 günlük sıfıra endirildi. Belə ki, həmin gün Naxçıvan 100 faiz yaşıl enerji ilə işıqlandırıldı. Bu təşəbbüslərimiz davam edəcək".
Bölmənin digər xəbərləri
