CÜDO ÜZRƏ OLİMPİYA ÇEMPİONU NAZİM HÜSEYNOVA HƏSR OLUNMUŞ “İLK QIZIL” FİLMİNİN TƏQDİMATI OLMUŞDUR
Bakı, 25 iyun (AZƏRTAC). İyunun 25-də Milli Olimpiya Komitəsinin (MOK) sifarişi ilə cüdo üzrə olimpiya çempionu Nazim Hüseynova həsr olunmuş “İlk qızıl” filminin təqdimatı olmuşdur.
Mərasimdə çıxış edən MOK-un vitse-prezidenti Çingiz Hüseynzadə, Milli Məclisin deputatı Eyvaz Qurbanov film haqqında məlumat vermiş, onun əhəmiyyətini və vacibliyini vurğulamışlar. Bildirmişlər ki, ictimaiyyət arasında bu cür idmançıları tanıtmaq üçün filmlər çəkilməsi məqsədəuyğundur. İlk film Nazim Hüseynov haqqındadır. Filmin ingilis dilinə tərcümə edilərək bütün dünyaya yayılması planlaşdırılır. Digər idmançılarımız haqqında da filmlər çəkiləcəkdir. Azərbaycanın müstəqilliyinin ilk illərində Nazim Hüseynovun uğuru Azərbaycanın idman tarixində yeni səhifə açmışdır. Bütün bunlar ümummilli lider Heydər Əliyevin və onun layiqli davamçısı İlham Əliyevin idmana göstərdiyi diqqət və qayğısı nəticəsində mümkün olmuşdur. “İlk qızıl” filmi gənc idmançılar üçün böyük töhfə olacaqdır.
Filmin rejissoru Arzu Qulamov, Vado Korovin və digər natiqlər də Nazim Hüseynovun uğurlarından bəhs etmiş, filmin əhəmiyyətini diqqətə çatdırmışlar.
Sonda Nazim Hüseynov təşkilatçılara minnətdarlığını bildirmiş, gənc idmançılara tövsiyələrini vermiş və uğurlar arzulamışdır.
######
Bölmənin digər xəbərləri
