Dağıntıdan dirçəlişə: Şəhərsalma narrativləri və media məsuliyyəti PANEL MÜZAKİRƏ VİDEO
Şuşa, 14 iyul, AZƏRTAC
İyulun 14-də IV Şuşa Qlobal Media Forumu çərçivəsində "Dağıntıdan dirçəlişə: Şəhərsalma narrativləri və media məsuliyyəti" mövzusunda panel müzakirəsi keçirilib.
AZƏRTAC xəbər verir ki, panel "AnewZ” televiziya kanalının baş redaktorun müavini Orxan Amaşovun moderatorluğu ilə baş tutub.
Anadolu Agentliyinin vitse-prezidenti və baş redaktoru Yusuf Özhan jurnalistikanın əsasən gündəlik hadisələrin işıqlandırılması ilə məşğul olduğunu deyib: "Bu hadisələr çox vaxt müvəqqəti xarakter daşıyır. Hətta, bəzən bir neçə gün əvvəl şahidi olduğumuz hadisələri belə tez unuduruq. Buna görə də peşəmizin vəzifələrindən biri də baş verənləri zamanın sınağından çıxacaq şəkildə qorumaqdır".
Onun sözlərinə görə, jurnalistika keçmişlə gələcək arasında körpü rolunu oynayır və bu baxımdan onun missiyası son dərəcə vacibdir.
"AnewZ” televiziya kanalının icraçı direktor Rüfət Həmzəyev deyib ki, media təkcə dağıntıları deyil, həm də dayanıqlılığı, bərpa və yenidənqurma prosesini işıqlandırmalıdır. O diqqətə çatdırıb ki, dağıntıların sənədləşdirilməsi ilə bərpa prosesinin işıqlandırılması arasında mühüm fərq var. Dağıntılar dərhal baş verir, bərpa isə daha uzun zaman tələb edən bir prosesdir. Dağıntılar təsirli görüntülər və diqqətçəkən başlıqlar yaradır. Bərpa prosesi isə daha mürəkkəb və çoxşaxəlidir.
"Burada medianın üzərinə düşən daha bir mühüm məsuliyyət var. Media yalnız baş verənləri çatdırmaqla kifayətlənməməlidir. Yaddaşın necə qorunacağını və gələcək nəsillərə necə ötürüləcəyini də düşünməliyik", - deyə Rüfət Həmzəyev deyib.
Bölmənin digər xəbərləri
