Dağların qoynunda təbiət incisi - Kükü kəndi VİDEO
Naxçıvan, 12 fevral, Nail Əsgərov, AZƏRTAC
AZƏRTAC-ın “Mən turist olsaydım” rubrikası: Şahbuz rayonunun Kükü kəndi.
Naxçıvan şəhərindən təxminən 50 kilometr məsafədə olan Kükü kəndi Naxçıvançayın ən böyük qollarından birinin - Kükü çayının yatağında yerləşir. Bu kənd haqqında danışarkən bir çoxlarının nəzərində gur sulu bumbuz bulaqlar, yaşıl çəmənlər, bir də dadlı almaların yetişdiyi bağlar canlanır.
Kükü kəndi ekoturizm və yürüş həvəskarları üçün əsl tapıntıdır. Gurbulaq və Qanlıgöl istiqamətində təşkil olunan turlar həm fiziki aktivlik, həm də ruhun dincəlməsi üçün ideal seçimdir. Buradakı unikal biomüxtəliflik və nadir landşaft “fotoovçuluq” həvəskarları üçün əvəzolunmaz kadrlar vəd edir. Xüsusilə Gurbulaq ətrafındakı mənzərələr ilin bütün fəsillərində göz oxşayır, insana fərqli duyğular bəxş edir.
Kükü kəndi qışda bir başqa gözəlliyə bürünür. Qarlı-şaxtalı qış fəsli kəndə xüsusi ab-hava qatır. Bəyaz örpəyə bürünən evlər və dağlar kəndin tarixi görkəmini daha qabarıq şəkildə üzə çıxarır, təbii gözəlliyini artırır. Qışda Kükü sanki sükunət və saflığın hökm sürdüyü nağıl aləmini xatırladır. Göy üzünün maviliyi ilə ağappaq qarın qovuşduğu bu vadi qışın dondurucu deyil, valehedici üzünü görmək istəyənlər üçün ideal məkandır. Dağların ətəyində sıralanan evlər və ağappaq təbiət mənzərəsi insanı şəhər gərginliyindən uzaqlaşdırır, sanki tamamilə fərqli bir dünyanın qapılarını açır.
Kənd mərkəzindən 7 kilometr məsafədə yerləşən Qanlıgöl Naxçıvanın ən qədim yurd yerlərindən biri hesab olunur. Yaz və yay aylarında buraya gələn turistlər yaylağa köçmüş çobanların həyat tərzi ilə yaxından tanış ola bilərlər. Çadırlarda dincəlmək, ocaqda bişirilmiş ətirli təndir kababından dadmaq, limonlu kəklikotu çayı ilə yorğunluq çıxarmaq bu səyahətin ən unudulmaz anlarına çevrilir. Yamyaşıl təpələrdə sıralanan arı yeşikləri isə bu yerlərin saf havasından və bərəkətindən xəbər verir.
Bölmənin digər xəbərləri
