DAHA BİR MƏKTƏBDƏ FUTBOL DƏRSİ
Bakı, 23 oktyabr (AZƏRTAC). Oktyabrın 23-də Nəsimi rayonundakı 240 saylı orta məktəbdə respublika Prezidenti tərəfindən imzalanmış «Azərbaycan Respublikasında 2005-2015-ci illərdə futbolun inkişafına dair Dövlət Proqramı»na uyğun olaraq, AFFA ilə Təhsil Nazirliyi arasındakı əməkdaşlıq müqaviləsi çərçivəsində «Məktəblərdə futbol dərsi» layihəsinin təqdimatı keçirilmişdir.
Tədbirdə AFFA-nın baş katibi Elxan Məmmədov, Bakı Şəhər Gənclər və İdman Baş İdarəsinin rəisi Raqif Abbasov və 240 saylı məktəbin direktoru Esmira Məmmədova çıxış edərək uşaq və yeniyetmələrin sağlam həyat tərzinə istiqamətləndirilməsi, futbolun kütləviliyinin artırılması baxımından bu layihənin mühüm əhəmiyyət kəsb etdiyini bildirmişlər.
Qeyd edək ki, 240 saylı orta məktəbdən əvvəl Badamdar qəsəbəsindəki 239 saylı orta məktəbdə də futbol dərsi tədris olunmağa başlamışdır. Bu dərslər AFFA-nın təyin etdiyi məşqçilər tərəfindən keçirilir. Bundan əlavə, 269 saylı məktəbdə də futbol dərsləri pilot layihəsi kimi tədris olunacaqdır.
Bölmənin digər xəbərləri
