Daha çox yaşlı valideynlərin autizmli uşaqları doğulur
Bakı, 11 iyun, AZƏRTAC
Autizm çoxfaktorlu xəstəlikdir. Onun inkişafı genlər və ətraf mühitlə bağlıdır. Xəstəlik riskinə yaş da təsir göstərir. Odur ki, ailə planlaşdıranda yaşı nəzərə almaq lazımdır.
İkana tibb məktəbinin (Nyu-York, ABŞ) mütəxəssisləri valideynlərin yaşının autizm riskinə təsirini aydınlaşdırmaq üçün Danimarka, İsrail, Norveç, İsveç və Qərbi Avstraliyadan olan 5.766.794 uşağın məlumatlarını təhlil ediblər. AZƏRTAC “The Daily Mail” nəşrinə istinadla xəbər verir ki, 30 min uşaqda autizm aşkar edilib. Özü də bu xəstəlik daha çox yaşlı valideynlərin körpələrində müşahidə olunub.
Yaşı 50-dən çox olan atanın körpəsində autizm riski 20-30 yaşlı ataların uşaqları ilə müqayisədə 66 faiz çoxdur. Yaşı 40-dan yuxarı və 18-dən aşağı olan anaların autizmli uşaqlar dünyaya gətirmək ehtimalı orta göstəricilərdən 15-18 faiz yüksəkdir.
Valideynlər arasında yaş fərqi də autizm riskini artıran səbəblərdəndir. Autizm riski istər ata 35-44 yaşında, xanımı isə 10 yaş kiçik olanda, istərsə də ana 30-40 yaşında, ata isə 10 yaş kiçik olanda artır.
Bölmənin digər xəbərləri
