DAHİ BƏSTƏKARIN XATİRƏ GECƏSİ
Dahi bəstəkar, Azərbaycan klassik musiqisinin banisi, ictimai xadim və pedaqoq Üzeyir Hacıbəyovun anadan olmasının ildönümü ölkəmizdə geniş qeyd edilir. Sentyabrın 17-də Azərbaycan Dövlət Musiqi Mədəniyyəti Muzeyində bu münasibətlə xatirə gecəsi keçirilmişdir. Tədbirdə incəsənət xadimləri, o cümlədən xalq artistləri Əminə Dilbazi, Azər Rzayev, habelə alimlər, ictimaiyyətin, kütləvi informasiya vasitələrinin nümayəndələri, tələbələr iştirak edirdilər.
Muzeyin ekspozisiya müdiri Tahirə Səfərova gecəni açaraq xüsusi vurğuladı ki, Azərbaycan Prezidenti Heydər Əliyevin Fərmanı ilə Üzeyir Hacıbəyovun anadan olduğu gün ölkəmizdə Milli musiqi günü kimi qeyd olunur. O, dahi bəstəkarın həyatı və yaradıcılıq yolu barədə qısa məlumat verərək bildirdi ki, Ü. Hacıbəyov yaratdığı təkrarolunmaz musiqi obrazları ilə dünya mədəniyyəti xəzinəsinə misilsiz töhfə vermiş, ölkəmizi dünyaya tanıdan istedadlı bəstəkarların bütöv bir nəslini yetişdirmişdir.
Sonra Üzeyir Hacıbəyovun əsərlərindən ibarət konsert oldu. Konsertdə Azərbaycan Dövlət Akademik Opera və Balet Teatrı, Dövlət Xor Kapellası, Musiqili Komediya Teatrı və Rəşid Behbudov adına Mahnı Teatrı solistlərinin ifasında “Leyli və Məcnun” operasından, “Arşın mal alan” musiqili komediyasından parçalar, “Koroğlu” operasının uvertürası və Nigarın ariyası səsləndirildi.
Bölmənin digər xəbərləri
