SİYASƏT
Demokratiya və insan hüquqları məsələlərindən digər ölkələrə təsir etmək üçün istifadə olunur - ŞƏRH
Bakı, 10 noyabr, AZƏRTAC
Təəssüf olsun ki, Qərb, əsasən də ABŞ demokratiya və insan hüquqları məsələlərindən digər ölkələrə təsir etmək üçün istifadə edir. Təsirin də əsas məqsədi öz maraqlarının təmin olunmasıdır. Bunun üçün dövlət və ya müxtəlif qeyri-hökumət təşkilatlarının fəaliyyətindən istifadə edilir. Heç kəsə sirr deyil ki, onlar öz planlarına nail olmaq üçün xarici ölkələrdə dövlət çevrilişlərinə də əl atırlar. 2000-ci illərdən sonra regionumuzda “narıncı və qızıl gül” və ya Yaxın Şərqdə “Ərəb baharı” kimi tanınan inqilabların arxasında Qərbin dayandığı məlumdur. Bu inqilabların ssenariləri ABŞ-ın kəşfiyyat xidmətlərinin sifarişləri əsasında müxtəlif şirkətlər və qeyri-hökumət təşkilatları tərəfindən hazırlanmışdı. Bu inqilabların üzərindən bir neçə il keçməsinə baxmayaraq, hələ də bir çox ölkədə vətəndaş müharibələri davam edir, ölkələrin dövlət quruluşları, siyasi, iqtisadi sistemləri dağıdılmış vəziyyətdədir.
Bu sözləri Ana Vətən Partiyası sədrinin müavini, politoloq Yalçın Hacızadə AZƏRTAC-a açıqlamasında söyləyib.
Onun sözlərinə görə, Qərb öz məqsədləri üçün Cənubi Qafqazda da belə fəaliyyətlə məşğuldur. Bir neçə gün bundan öncə Gürcüstan Dövlət Təhlükəsizlik Xidməti bu ölkədə yenidən dövlət çevrilişi üçün ictimai fəalların böyük bir qrupuna təlimlərin keçirilməsi, inqilabi proseslərin planlaşdırılması üçün ABŞ tərəfindən vəsaitin ayrıldığı, oktyabr-dekabr aylarında Gürcüstanda dövlət çevrilişinə cəhdin olacağı barədə məlumat yayıb. Bu fəaliyyət əsasən ABŞ-ın Beynəlxalq İnkişaf Agentliyi (USAID), NED, Fridrix Nauman, Marşall, IREX və digər təşkilatları tərəfindən aparılır.
“Azərbaycan dövləti Qərbin bu kimi təsisatlarının planlarını əvvəlcədən görə bildiyi üçün bir çox qurumların ölkəmizdə fəaliyyətini dayandırıb. Belə qurumları Azərbaycandakı Dövlət-Hökumət-Xalq birliyi çox narahat edir. Onlar hakimiyyətə elə şəxsi gətirməyə çalışırlar ki, öz xalqının milli marağını deyil, onları hakimiyyətə gətirən qüvvələrin maraqlarına xidmət etsin. Soros Fondunun maliyyə dəstəyi ilə postsovet məkanında 2005-ci ildə “inqilablar” populyar olan zaman Azərbaycana da narıncı geyimlər, narıncı bantlar gətirmişdilər və bizim ölkəmizdə də belə bir inqilab həyata keçirmək arzusunda idilər, amma bunu bacara bilmədilər. Sonra 2010-cu ildə Yaxın Şərqdə “ərəb baharı” başlayanda da yenidən ümidləndilər, təkrar buna cəhd etdilər. Bu dəfə də istəklərinə çata bilmədilər. Çünki Azərbaycanda Dövlət-Hakimiyyət-Xalq birliyi sarsılmazdır. Vətəndaşlar seçdiyi Prezident İlham Əliyevin ətrafında sıx birləşiblər.
Ona görə həmin qüvvələr hər dəfə çalışırlar ki, Azərbaycana qarşı şər-böhtan kampaniyası aparsınlar, xalqın vahidliyini parçalasınlar, vətəndaş həmrəyliyini, fikrini pozsunlar, siyasi sabitliyi laxlatsınlar. Bu istiqamətdə mütəmadi fəaliyyət həyata keçirilir. Ermənipərəst Samanta Pauerin rəhbərlik etdiyi USAID bu istiqamətdə daha çox canfəşanlıq göstərir. Qurum hətta fəaliyyət göstərdiyi ölkənin xarici siyasətinin əksinə olaraq, Azərbaycanın ərazi bütövlüyünə və suverenliyinə qarşı çıxır, azərbaycanlılara qarşı törədilmiş vəhşilikləri, soyqırımları görməzdən gələrək, ermənilərin “etnik təmizləməyə” məruz qaldığına dair yalanları tirajlayır. Təəssüf olsun ki, bu məqsədlər üçün öz içimizdə yarada bildikləri təşkilatlar və siyasi partiyalardan da istifadə edə bilirlər”,- deyə politoloq vurğulayıb.
Y.Hacızadə əlavə edib ki, USAID kimi təşkilatlar sifariş aldıqları dövlətlərin istəklərini rahat şəkildə həyata keçirmək məqsədilə ölkələrdə “parçalanmış cəmiyyətlər” yaradırlar. Həmçinin xalqın milli, dini, tarixi, ailə və məişət dəyərlərinin yad ünsürlərlə dəyişilməsinə çalışırlar. Elə təəssürat yaradırlar ki, müasirləşmək üçün Qərb dəyərlərini mənimsəmək lazımdır. Halbuki tarix göstərdi ki, ölkələr tarixi, milli dəyərlərini qorumaqla da inkişaf edə, müasir cəmiyyət və dövlət qura bilərlər.
“Hər kəsə məlumdur ki, Azərbaycan dövləti, Prezident İlham Əliyev müstəqil və xalqın milli maraqlarına söykənən siyasət həyata keçirir. Heç bir dövlət, beynəlxalq təşkilat Azərbaycana diktə edə bilməz. Azərbaycanla ancaq əməkdaşlıq etmək mümkündür, güc, şantaj yolu ilə danışmaq mümkün deyil. Bunun da əsas səbəbi yuxarıda bildirdiyim kimi Dövlət-Hakimiyyət-Xalq birliyidir. Əlbəttə, indiki dövrdə müstəqil siyasət aparıb, milli və dövlət maraqlarından çıxış etmək haradasa mümkünsüz hala gəlib. Amma Azərbaycan bütün təzyiqlərə baxmayaraq, hazırkı mürəkkəb geosiyasi zamanda bunu bacara bilən çox az ölkələrdəndir. Dövlətimizin başçısı İlham Əliyevin bildirdiyi kimi “ayrı-ayrı dövlətlərin qanadları altına sığınıb siyasət həyata keçirmək ən asan yoldur, amma biz o yolu seçmədik. Biz çətin, lakin şərəfli yol - müstəqillik yolunu seçdik. Təbii ki, böyük dövlətin qanadı altına sığınan dövlət onun diktəsi ilə fəaliyyət göstərəcək, xalqının milli maraqlarını kənara atacaq, onun sərvətləri talan ediləcək. Bizim birliyimiz və həmrəyliyimiz isə bizim nicat yolumuzdur. Çünki ölkəmizi xaos çevirmək istəyən çoxsaylı siyasi dairələrin olduğunu gözəl bilirik”.