Deputat: Azərbaycan-Özbəkistan iqtisadi əməkdaşlığının genişlənməsi qarşıya daha böyük hədəflər qoyub
Bakı, 23 avqust, AZƏRTAC
Azərbaycan və Özbəkistan arasında son illərdə iqtisadi əməkdaşlığın genişlənməsi iki ölkənin qarşısına daha böyük hədəflər qoyub. Bu əməkdaşlığın əsas istiqamətlərindən biri qarşılıqlı ticarət dövriyyəsinin artırılmasıdır. Tərəflər 2030-cu ilədək bu göstəricini 1 milyard ABŞ dollarına çatdırmağı hədəfləyir. Bunun üçün 2025-ci ildə xüsusi Fəaliyyət Planı qəbul edilib. Eyni zamanda, “Azərbaycan Respublikası ilə Özbəkistan Respublikası arasında 2025-2027-ci illər üzrə sənaye əməkdaşlığı Proqramı” imzalanıb.
Bu sözləri AZƏRTAC-a açıqlamasında Milli Məclisin deputatı Sadiq Qurbanov deyib.
O bildirib ki, bu hədəfin reallaşdırılması üçün ticarət nomenklaturasının genişləndirilməsi, birgə müəssisələrin sayının artırılması, investisiya layihələrinin maliyyələşdirilməsi və nəqliyyat əlaqələrinin daha səmərəli qurulması mühüm əhəmiyyət daşıyır. Azərbaycan–Özbəkistan iqtisadi əlaqələrinin son illərdəki inkişafı rəqəmlərdə aydın görünür. Ticarət dövriyyəsinin sürətlə artması, Özbəkistanda Azərbaycan kapitallı müəssisələrin sayının 280-dən 442-yə yüksəlməsi, 500 milyon dollarlıq Azərbaycan-Özbəkistan İnvestisiya Şirkətinin yaradılması və 2030-cu il üçün 1 milyard dollarlıq ticarət dövriyyəsi hədəfinin müəyyənləşdirilməsi iqtisadi tərəfdaşlığın strateji xarakter aldığını göstərir.
Deputat nəzərə çatdırıb ki, gələcəkdə əsas məsələ yalnız ticarət dövriyyəsinin həcmini artırmaq deyil, həm də onun strukturunu şaxələndirməkdir. Sənaye kooperasiyası, kənd təsərrüfatı, energetika, rəqəmsal texnologiyalar və logistika sahələrində yeni layihələrin həyata keçirilməsi Azərbaycan və Özbəkistan arasında iqtisadi əməkdaşlığı daha dayanıqlı və qarşılıqlı faydalı modelə çevirə bilər. Bu ilin iyulunda keçirilmiş hökumətlərarası komissiyanın 15-ci iclasında da məhz ticarət, investisiya, sənaye, energetika və nəqliyyat-logistika üzrə əməkdaşlığın genişləndirilməsi müzakirə olunub. Qarşılıqlı əlaqələrin inkişafı tərəflər üçün olduqca səmərəlidir.
“Prezident İlham Əliyevin Özbəkistanın Milli İnformasiya Agentliyinə (UzA) müsahibəsində dediyi kimi, Azərbaycan ilə Özbəkistanın iqtisadi imkanları bir-birini tamamlayır və yeni əməkdaşlıq formatlarının yaradılması üçün geniş üfüqlər açır: “Biz Azərbaycan şirkətlərinin Özbəkistanda və özbək şirkətlərinin Azərbaycanda daha fəal iştirakını, həmçinin birgə istehsal və investisiya layihələrinin sayının artmasını dəstəkləyirik”. Beləliklə, Azərbaycan və Özbəkistan arasında iqtisadi münasibətlər artıq sadəcə ikitərəfli ticarət əlaqəsi deyil, investisiya, istehsal, logistika və regional iqtisadi inteqrasiyanı əhatə edən çoxşaxəli tərəfdaşlıq modelinə çevrilməkdədir”, – deyə Milli Məclisin deputatı vurğulayıb.
Bölmənin digər xəbərləri
