Deputat: Yaxın qohum evliliyi ilə əlaqədar ciddi cəza tədbirlərinin görülməsi mütləqdir
Bakı, 20 iyun, AZƏRTAC
Azərbaycanda ailə institutu dəyərlidir və diqqətdə saxlanılır. Ümid edirəm ki, yaxın qohumların nikahı ilə bağlı prosesin qabağını ala biləcəyik.
AZƏRTAC xəbər verir ki, bu fikirləri Milli Məclisin deputatı Ceyhun Məmmədov iyunun 20-də parlamentdə keçirilən “Sağlam ailə modeli və nikah hüququ” mövzusunda birgə ictimai dinləmədə səsləndirib.
Nikah yaşının azaldılması məsələsinə toxunan deputat bunun fəsadlara gətirib çıxardığını deyib.
Maarifləndirmə işinin əhəmiyyətini diqqətə çatdıran C.Məmmədov qeyd edib: “Yaxın qohum evliliyi ilə bağlı ciddi cəza tədbirlərinin görülməsi mütləqdir. İnandırıcı deyil ki, bölgələrdə yaxın qohumlar nikaha girəndə bundan icra hakimiyyəti orqanlarının, məktəbin xəbəri olmasın. Rayonlarda əlaqədar qurumlar kompleks şəkildə işləməlidirlər. Ölkədə boşanmaların sayının artması erkən nikahların fəsadlarındandır”.
Deputat bildirib ki, rəsmi nikah olmadan dini nikahın bağlanmasının qarşısı alınmalıdır. Qanunvericilikdə bununla bağlı inzibati cəzaların müəyyən edilməsinə ehtiyac var.
Bölmənin digər xəbərləri
