Dövlət əmlaklarının özəlləşdirilməsi ilə bağlı sifarişlərin 280-ə yaxını elektron şəkildə həyata keçirilib
Bakı, 1 may, AZƏRTAC
Dövlət əmlaklarının özəlləşdirilməsi ilə bağlı edilən sifarişlərin 280-ə yaxını elektron şəkildə həyata keçirilib.
Əmlak Məsələləri Dövlət Komitəsindən (ƏMDK) AZƏRTAC-a bildirilib ki, komitə tərəfindən özəlləşmə sahəsində tətbiq olunan yeniliklər investorların rahatlıqla biznes mühitində iştirakını təmin edir. Ölkəmizdə özəlləşdirilmə prosedurlarının sadələşdirilməsi, hərracların elektron müstəviyə keçməsi, o cümlədən bu sahədə onlayn xidmətlərin təşkil edilməsi, perspektivli müəssisələrin özəlləşməyə çıxarılması xarici investorların cəlb edilməsinə geniş imkanlar yaradır. Özəlləşmə xidmətlərinə olan əlçatanlıq artırılır. Komitənin 41 xidmətindən 10-u özəlləşmə sahəsinə aiddir. Qeyd edilməlidir ki, daha çox bu sahədə praktiki xidmətlər elektronlaşdırılıb.
Onlayn qatılmaqla yanaşı, hərraclarda elektron qaydada qeydiyyatdan keçmək, iştirakçı statusu qazanmaq üçün sifariş vermək, qeydiyyatdan keçmədən onlayn izləmək imkanları mövcuddur. Bununla da hərrac prosesi tam elektronlaşır. Prosesə həm elektron, həm də canlı olaraq da qatılmaq mümkündür.
Ümumilikdə dövlət əmlaklarının özəlləşdirilməsi ilə bağlı edilən sifarişlərin 280-ə qədəri elektron şəkildə həyata keçirilib. Cari il ərzində bu rəqəm 40-a yaxındır. Olduğu məkanı dəyişmədən, real vaxt rejimində 30-dək vətəndaş hərraca internet vasitəsilə onlayn rejimdə qatılıb. Özəlləşmə ilə əlaqədar keçirilən hərracların elektron müstəviyə keçirilməsi investorların aktivliyini artırmaqla prosesi rəqabətli edir. Ümumilikdə hərracların 170-ə yaxını rəqabətli şəkildə baş tutub. Bunun 40-a yaxını isə cari ilin payına düşür.
Hərraclara çıxarılan dövlət əmlakları barədə ictimai məlumatlandırma komitənin elektron resursları vasitəsilə də aparılır. Özəlləşdirməyə çıxarılan dövlət əmlakları barədə ətraflı məlumatın əldə olunması və hərracda iştirak müraciəti komitənin rəsmi saytı (emdk.gov.az) və Özəlləşdirmə portalı (privatization.az) ilə mümkündür.
Hərrac gününə ən azı 30 gün qalmış özəlləşdirmə haqqında məlumat komitənin rəsmi mətbu orqanı olan “Mülkiyyət” qəzetində də dərc edilir. Özəlləşdirməni sürətləndirməyə, şəffaflığı və rahatlığı artırmağa yönələn Özəlləşdirmə portalına ilin ilk 3 ayı ərzində 200 mindən çox baxış olub.
Dövlət əmlaklarının özəlləşdirilməsi üzrə keçirilən hərraclarda bu ilin ilk üç ayı ərzində ümumilikdə 42 hərrac keçirilib. Hərraca çıxarılan dövlət əmlaklarından 260-a yaxını özəlləşdirilib.
Bölmənin digər xəbərləri
