“DP World” şirkətlər qrupunun sədri Bakıya gəlir
Bakı, 24 aprel, Elvin Camalov, AZƏRTAC
Birləşmiş Ərəb Əmirliklərinin “DP World” şirkətlər qrupunun sədri Sultan Əhməd bin Sulaim Bakıya gəlir.
AZƏRTAC xəbər verir ki, bu barədə “Bakı Beynəlxalq Dəniz Ticarət Limanı” QSC məlumat yayıb.
Bildirilib ki, “DP World” şirkətlər qrupunun sədrinin səfərinin məqsədi mayın 9-da paytaxt Bakıda “Gələcəyin limanları: qovşaqlar yaratmaqla, qarşılıqlı əməkdaşlığın gücləndirilməsi” mövzusuna həsr olunan Beynəlxalq Limanlar Assosiasiyasının (IAPH) konfransında iştirak etməkdir. Sultan Əhməd bin Sulaim konfransın açılış mərasiminin əsas çıxışçılarından biri olacaq. “DP World” şirkəti dünyanın 42 ölkəsində 78 dəniz və quru terminalı idarə edir.
Xatırladaq ki, Beynəlxalq Limanlar Assosiasiyası (IAPH) 90 ölkədə 180-ə yaxın liman və limanlarla əlaqəsi olan 140 müəssisəni təmsil edir. Təşkilatın üzvləri dünya dəniz ticarətinin 60 faizindən çoxunu həyata keçirir və beynəlxalq konteyner marşrutlarının 80 faizinə nəzarət edir. IAPH hər il iri liman şəhərlərində konfranslar keçirir. Los-Anceles (2013), Sidney (2014), Hamburq (2015), Panama (2016) və Bali (2017) bundan əvvəlki konfranslara ev sahibliyi ediblər.
“IAPH Baku 2018”in iştirakçıları “Bir Kəmər - Bir Yol” təşəbbüsü çərçivəsində nəqliyyat dəhlizlərinin yaradılması, azad ticarət zonalarının milli iqtisadiyyata və qonşu ölkələrin iqtisadiyyatına töhfəsi və XXI əsrdə “SmartPorts” və “Yaşıl limanlar” konsepsiyası kimi mühüm və maraqlı mövzuların müzakirəsi üçün unikal imkan əldə edəcəklər.
Bölmənin digər xəbərləri
