ƏBDÜL-REDA ASSİRİ: DAĞLIQ QARABAĞDA AZƏRBAYCANIN ÜÇRƏNGLİ BAYRAĞI MÜTLƏQ DALĞALANACAQDIR
AZƏRTAC xəbər verir ki, bu sözləri Küveyt Universitetinin ictimai elmlər fakültəsinin siyasi elmlər departamentinin rəhbəri, professor Əbdül-Reda Assiri “İki sahil” qəzetinin redaksiyasında qonaq olarkən demişdir.
Məlumat verildiyi kimi, ulu öndərin 85 illik yubileyi ilə bağlı Heydər Əliyev Fondu və Yeni Azərbaycan Partiyası “Demokratiya və sabitlik naminə: Əməkdaşlığın yeni imkanları” mövzusunda beynəlxalq konfrans keçirmişdir. Dünyanın 30-dan çox ölkəsindən 60-dan artıq nümayəndənin iştirak etdiyi tədbirdən sonra qonaqlar müxtəlif görüşlərdə təəssüratlarını bölüşürlər.
Əbdül-Reda Assiri “İki sahil” qəzeti redaksiyasının kollektivi ilə görüşündə ölkəmizə, onun paytaxtına heyran qaldığını bildirmişdir. Bakı qədimliklə müasirliyi özündə təcəssüm etdirən möhtəşəm şəhərdir, - deyə o, vurğulamışdır. Şəhərdə geniş qurculuq və abadlıq işlərini yeniliyin rəmzi kimi qiymətləndirən qonaq qeyd etmişdir ki, Bakıda gördüklərimdən çox məmnun qalmışam. Azərbaycana ilk səfərim olsa da burada gördüklərimdən, insanların doğma münasibətindən məmnun qaldım. Azərbaycan həqiqətən demokratiya yolu ilə inkişaf edən sivil dövlətdir. Burada insanların yaxşı yaşayıb, ölkə iqtisadiyyatının inkişafında səmərəli fəaliyyət göstərməsi üçün hər cür şərait yaradılmışdır.
Jurnalistlərlə görüşünə böyük əhəmiyyət verdiyini söyləyən qonaq, ilk növbədə, Azərbaycanda mətbuat azadlığının yüksək səviyyədə olduğunu bildirmişdir. Qeyd etmişdir ki, Prezident İlham Əliyevlə görüşü zamanı dövlət başçısının ölkədə söz, mətbuat azadlığının təminatında maraqlı olduğunu bütün qonaqlar yüksək qiymətləndirdilər.
Küveytli alimin sözlərinə görə, Azərbaycanda şərqlilərə məxsus millilik qorunub saxlanılmaqla, Avropa dəyərlərinə də hörmətlə yanaşılır, dünya təcrübəsindən istifadə olunur. Bu, bir daha göstərir ki, Azərbaycan inkişafını bəşəri dəyərlər əsasında qurmaqla dünya birliyinə sürətlə inteqrasiya olunmaqdadır. Haqlı olaraq bizdə belə təəssürat yarandı ki, Azərbaycan dünya dövlətləri arasında dinamik inkişafı ilə fərqlənən sivil bir ölkədir. Burada gördüklərim barədə öz ölkəmdə ətraflı danışacaq, Azərbaycan həqiqətlərinin təbliğatçısı kimi fəaliyyət göstərəcəyəm.
Əbdül-Reda Assiri öz ölkəsindəki kütləvi informasiya vasitələri ilə bağlı məlumat verərkən bildirmişdir ki, Küveytdə hazırda cəmi 5 mətbu orqan fəaliyyət göstərir. Parlament tərəfindən “Mətbuat haqqında” qanunun qəbulundan sonra onların sayı 13-ə çatdırılacaq, bir neçə qəzet ingilis dilində nəşr olunacaqdır.
“İki sahil” qəzetinin Baş redaktoru Vüqar Rəhimzadə ölkəmiz haqqında xoş sözlərinə görə qonağa təşəkkürünü bildirmiş və əsası ümummilli lider Heydər Əliyev tərəfindən qoyulan söz və mətbuat azadlığının bu gün Prezident İlham Əliyev tərəfindən uğurla davam etdirildiyini vurğulamışdır. Baş redaktor Azərbaycanda söz və mətbuat azadlığının daha da inkişafı üçün dövlət tərəfindən hər cür şəraitin yaradıldığını küveytli alimin diqqətinə çatdırmışdır. Qeyd etmişdir ki, Azərbaycanda naşirlik etmək istəyənlər üçün geniş imkanlar yaradılmış, prosedurlar sadələşdirilmişdir.
Professor Əbdül-Reda Assiri görüşdən, Azərbaycanda azad mətbuatın inkişafı üçün yaradılan şəraitdən məmnun qaldığını bildirmiş və demişdir: “İnanıram ki, ölkənizə növbəti səfərimdə Azərbaycanın tarixi ərazisi olan Dağlıq Qarabağla elə azərbaycanlıların müşayiəti ilə tanış olacağam. Prezident İlham Əliyevin qətiyyəti sübut edir ki, o günə az qalıb. Dağlıq Qarabağda Azərbaycanın üçrəngli bayrağı mütləq dalğalanacaqdır”.
######
Bölmənin digər xəbərləri
