Əbu-Dabidə Prezident sarayı xalqa açıq olacaq
Əbu-Dabi, 5 mart, AZƏRTAC
Martın 11-də Əbu-Dabidəki Prezident sarayı ilk dəfə öz qapılarını Birləşmiş Ərəb Əmirlikləri əhalisinin üzünə açacaq.
AZƏRTAC yerli KİV-lərə istinadla xəbər verir ki, bununla bağlı Birləşmiş Ərəb Əmirliklərinin Prezidenti Şeyx Xəlifə bin Zayed Al Nəhyan və Əbu-Dabi Əmirliyinin vəliəhdi, Birləşmiş Ərəb Əmirlikləri Silahlı Qüvvələrinin Ali Baş Komandanının müavini Şeyx Məhəmməd bin Zayed Al Nəhyan göstəriş veriblər.
Prezident sarayı hazırda bu ölkənin Nazirlər Kabinetinin və Federal Ali Şuranın, həmçinin dövlətin liderlərinin rəsmi görüş yeridir.
Prezident sarayını ziyarət edənlər Birləşmiş Ərəb Əmirliklərinin ənənələri və dəyərləri ilə tanış olacaq, habelə ölkənin irsini daha yaxından öyrənəcəklər. Sarayda Əmirliklərin tarixi və mədəniyyəti haqqında kitab kolleksiyasının toplandığı “Qəsr Əl Vətən” kitabxanası mövcuddur. Ölkə vətəndaşları və turistlər axşam saatlarında binanın fasadında Birləşmiş Ərəb Əmirliklərinin keçmişi, bu günu və gələcəyi ilə bağlı hazırlanmış möhtəşəm işıq və səs şousundan zövq alacaqlar.
Asya Hacızadə
AZƏRTAC-ın xüsusi müxbiri
Əbu-Dabi
Bölmənin digər xəbərləri
