Azərbaycanın zəngin qastronomik irsi Sofiyada təqdim olunub
Sofiya, 18 iyun, AZƏRTAC
Azərbaycanın Bolqarıstandakı səfirliyi 18 iyun – Dayanıqlı Qastronomiya Günü münasibətilə xüsusi tədbir təşkil edib.
AZƏRTAC xəbər verir ki, tədbirdə Azərbaycan və Bolqarıstandan dövlət rəsmiləri, merlər, kənd təsərrüfatı, turizm, ətraf mühit, qonaqpərvərlik və qastronomiya sahələrinin nümayəndələri, akademik dairələrin və media qurumlarının təmsilçiləri, həmçinin beynəlxalq təşkilatların nümayəndələri iştirak ediblər.
Tədbiri açan Azərbaycanın Bolqarıstandakı səfiri Elmar Məmmədov ölkəmizin kulinariya ənənələri, mədəni irsi və dayanıqlı inkişaf arasında mövcud olan dərin bağlılıqdan danışıb. O bildirib ki, Azərbaycanın zəngin mətbəx irsi insan, mədəniyyət və təbii mühit arasında harmoniyanı əks etdirən dəyərlərə əsaslanır. Səfir qeyd edib ki, Azərbaycan mətbəxində təbiətə hörmət, mövsümi məhsullardan istifadə, biomüxtəlifliyin qorunması və təbii ehtiyatlardan məsuliyyətlə yararlanmaq kimi prinsiplər əsrlər boyu yaşadılıb.
Elmar Məmmədov vurğulayıb ki, Azərbaycan lavaşı, təndirdə çörəkbişirmə ənənəsi, dolma, çay mədəniyyəti və Nar bayramı UNESCO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilib. Bu nümunələr milli kulinariya mədəniyyətinin yerli məhsullara, ənənəvi biliklərə və dayanıqlı istehlak prinsiplərinə əsaslandığını nümayiş etdirir.
Səfir, həmçinin dayanıqlı qastronomiyanın Azərbaycanın COP29 Sədrliyi çərçivəsində irəli sürdüyü COP29 Fermerlər üçün Harmoniya İqlim Təşəbbüsünün məqsədləri ilə uzlaşdığını qeyd edib. O, BMT-nin 2026-cı ili Beynəlxalq Qadın Fermerlər İli elan etməsinin əhəmiyyətini vurğulayaraq qadınların kənd təsərrüfatı və ərzaq təhlükəsizliyinə töhfəsini xüsusi qeyd edib.
Tədbirdə Plovdiv Qida Texnologiyaları Universitetinin professoru Hafizə Fidan dayanıqlı qida istehsalı və istehlakına dair müasir yanaşmalar barədə məlumat verib. BMT-nin Ərzaq və Kənd Təsərrüfatı Təşkilatının (FAO) rəhbər orqanlar üzrə mütəxəssisi Şahnur Şahinzadə COP29 Fermerlər üçün Harmoniya İqlim Təşəbbüsü çərçivəsində görülən işlərdən danışıb. Dövlət Turizm Agentliyinin Qastronomiya şöbəsinin müdiri Səkinə Əsgərova isə Azərbaycanın zəngin kulinariya irsini və onun dayanıqlı turizmin inkişafındakı rolunu təqdim edib.
Müzakirələrdən sonra qonaqlara Azərbaycan milli mətbəxinin nümunələri təqdim olunub. Bakı Slavyan Universitetinin "Müqəddəs Kliment Oxridski" adına Sofiya Universitetindəki Azərbaycan Dili və Mədəniyyət mərkəzininin direktoru Sofiya Şıqayeva-Mitreska iştirakçılara Azərbaycan mətbəxinin tarixi və xüsusiyyətləri barədə ətraflı məlumat verib.
Qonaqlar şah plov, yarpaq dolması, göyərti və ətli qutab, manqal salatı, doğramaç, Bakı və Şəki paxlavası, Naxçıvan sucuğu, Gəncə şokoladları və şəkərbura kimi ənənəvi Azərbaycan təamlarını dadıblar.
Tədbirdə vurğulanıb ki, qastronomiya yalnız mədəni irsin mühüm hissəsi deyil, həm də dayanıqlı ərzaq sistemlərinin inkişafı, yerli icmaların dəstəklənməsi və məsuliyyətli istehlakın təşviqi baxımından əhəmiyyətli vasitədir. Bununla yanaşı, qastronomiyanın mədəni diplomatiyanın inkişafına və Azərbaycan ilə Bolqarıstan xalqları arasında əlaqələrin möhkəmlənməsinə töhfəsi qeyd olunub.
Bölmənin digər xəbərləri
