Ekvadorda kəskin hava şəraiti 126 nəfəri evsiz qoyub
Bakı, 20 iyun, AZƏRTAC
Ekvadorda, xüsusən də ölkənin mərkəzi və Amazon əyalətlərində təxminən 126 nəfər ekstremal hava şəraiti ilə əlaqədar olaraq evsiz qalıb.
AZƏRTAC xəbər verir ki, bununla bağlı Ekvadorun Milli Risklərin İdarə Edilməsi Agentliyi məlumat yayıb. Bildirilib ki, ölkənin 24 əyalətindən 10-da hava ilə bağlı fövqəladə vəziyyət qeydə alınıb.
Son hesabata görə, bu cür hadisələrin əsasını torpaq sürüşmələri (44,44 faiz) və daşqınlar (22,22 faiz) təşkil edir. Məlumatda qeyd edilib ki, yaşayış obyektləri ilə yanaşı, üç körpü dağılıb, dörd körpü də zədələnib.
Qeyd edək ki, bazar günü Banos de Aqua Santa kurort şəhərində güclü yağışlar nəticəsində torpaq sürüşməsi baş verib. Nəticədə ən çox zərər çəkən ərazilərdən biri olan Tunqurahua əyalətində 8 nəfər ölüb, 18 nəfər itkin düşüb.
Bölmənin digər xəbərləri
