“EL YOLUNDA… AŞIQ ŞAKİR” SƏNƏDLİ FİLMİNİN İSTEHSALI BAŞA ÇATMIŞDIR
AZƏRTAC “Azərbaycan Televiziya və Radio Verilişləri” Qapalı Səhmdar Cəmiyyətinin mətbuat xidmətinə istinadla xəbər verir ki, «Azərbaycantelefilm» Yaradıcılıq Birliyində «El yolunda…Aşıq Şakir» sənədli televiziya filminin istehsalı başa çatmışdır. Film Şirvan aşıq məktəbinin tanınmış nümayəndəsi Aşıq Şakir Hacıyevin həyat və yaradıcılığına həsr olunmuşdur.
Aşıq Şakir rəngarəng mahnı yaradıcılığı və məlahətli səsi ilə yaddaşlarda iz buraxmışdır. Onun söylədiyi dastanlar, ifa etdiyi «Şirvan şikəstəsi», «Sarıtorpaq şikəstə» qeyri-adiliyi ilə fərqlənmiş, sonrakı nəsil ifaçıları üçün örnək olmuşdur. Muğam sənəti ilə aşıq yaradıcılığı arasında vəhdət yaratmış Aşıq Şakir Hacıyevin məharəti öz dövrünün sənətkarları tərəfindən həmişə yüksək qiymətləndirilmişdir.
Yaxın günlərdə AzTV-nin ekranlarında tamaşaçılara təqdim olunacaq filmin ssenari müəllifi Eldar İsgəndərzadə, quruluşçu rejissoru Vasif Məmmədzadə, quruluşçu operatoru Mahir Cahangirovdur.
Bölmənin digər xəbərləri
