İQTİSADİYYAT
“Embafinans” QSC-nin istiqrazlarının “Açılış Zəngi” mərasimi keçirilib
Bakı, 4 noyabr, AZƏRTAC
Noyabrın 4-də Bakı Fond Birjasında (BFB) BOKT “Embafinans” QSC-nin kapital bazarlarında növbəti istiqraz buraxılışını qeyd etmək məqsədilə “Açılış Zəngi” mərasimi keçirilib.
BFB-dən AZƏRTAC-a bildirilib ki, 1 milyon 500 min manat həcmində olan yerləşdirmənin anderrayteri “ABB-İnvest İnvestisiya Şirkəti” QSC-dir. BFB-nin sədri vəzifəsini müvəqqəti icra edən Eldar Abdullayev BOKT “Embafinans” QSC-nin birja vasitəsilə həyata keçirdiyi istiqraz buraxılışının Azərbaycanda maliyyə sektorunun inkişafı istiqamətində aparılan tədbirlərin uğurlu nəticəsi olduğunu, maliyyə sektorunun inkişafına töhfə verməklə yanaşı, vətəndaşlar üçün yeni investisiya imkanlarının formalaşmasında xüsusi rol oynayacağını deyib. Bildirilib ki, eyni zamanda, qeyd olunan istiqrazlar korporativ qiymətli kağızlar bazarında maliyyə alətlərinin diversifikasiyasına səbəb olmaqla investorlar üçün daha geniş imkanların olduğu münbit investisiya mühiti formalaşdıracaq. Tədbirin sonunda istiqrazların ilkin bazarda ticarətə buraxılışını simvolizə etmək məqsədilə “Açılış Zəngi” çalınıb və istiqrazların BFB-nin ticarət platformasında ticarətinə başlanılıb.