Ermənilərin azərbaycanlılara qarşı törətdikləri vəhşiliklər yaddaşlardan heç zaman silinməyəcək
Şamaxı, 31 mart, AZƏRTAC
31 Mart - Azərbaycanlıların Soyqırımı Günü Şamaxıda kütləvi tədbirlərlə qeyd olunub.
AZƏRTAC xəbər verir ki, rayon rəhbərliyi, hüquq-mühafizə orqanlarının, idarə, müəssisə və təşkilatların kollektivləri, ictimaiyyət nümayəndələri martın 31-də Soyqırımı abidəsini ziyarət edərək önünə tər çiçəklər düzüb, qanlı hadisələrdə həlak olanların xatirəsini yad ediblər.
Heydər Əliyev Mərkəzində davam etdirilən tədbirdə şəhidlərin xatirəsi bir dəqiqəlik sükutla yad olunub.
Rayon icra hakimiyyətinin başçısı Asif Ağayev, ADPU-nun Şamaxı filialının dosenti Zərifə Cavadova, Ağsaqqallar Şurasının sədri Mayıl Alıcanov çıxış edərək əsrlərboyu bədnam ermənilər və onların havadarları tərəfindən türk xalqına, o cümlədən azərbaycanlılara qarşı həyata keçirilən deportasiya və soyqırımı siyasətinin əsl mahiyyətindən danışıb, bu siyasətin dəhşətli nəticələri barədə tarixi faktları diqqətə çatdırıblar. Qeyd olunub ki, təkcə 1918-1920-ci illərdə ermənilər tərəfindən törədilən kütləvi qırğınların Bakı, Quba, Şamaxı, Kürdəmir və Lənkəran ilə yanaşı, Şuşada, İrəvan quberniyası ərazisində, Zəngəzurda, Naxçıvanda, Şərurda, Ordubadda, Qarsda və başqa bölgələrdə davam etdirilməsi nəticəsində yüz minlərlə azərbaycanlı ən qəddar üsullarla qətlə yetirilib, bir milyondan çox əhali öz doğma torpaqlarından didərgin salınıb. Vurğulanıb ki, 1918-ci ildə Şamaxıda törədilən soyqırımı zamanı ən böyük qırğınlardan biri Cümə məscidində törədilib. Məsciddə 1700-dən çox günahsız insan qətlə yetirilib, yandırılıb. Ümumiyyətlə, həmin ilin mart ayında Şamaxı qəzasının 58 kəndində 8 mindən çox, təkcə Şamaxı şəhərində 7 mindən artıq dinc əhali amansızlıqla öldürülüb.
Bildirilib ki, Şamaxı qırğınına 31 nəfər erməni, o cümlədən Stepan Lalayan, Qavril Karaoğlanov, Arşak Gülbəndiyan, Mixail Arzumanov, Karapet Karamonov, Sedrak Vlasov, Samvel Doliev və başqaları rəhbərlik ediblər.
Çıxışlarda ermənilərin 1918-ci ilin mart ayında azərbaycanlılara qarşı törətdikləri vəhşiliklərin yaddaşlardan heç zaman silinməyəcəyi qeyd olunub. Bildirilib ki, Azərbaycan Respublikası yalnız müstəqillik qazandıqdan sonra xalqımızın tarixi keçmişinin obyektiv mənzərəsini yaratmaq imkanı əldə edilib. Uzun illər gizli saxlanılan, üzərinə qadağa qoyulan həqiqətlər açılıb, təhrif edilən hadisələr özünün əsl qiymətini alıb. Ulu öndər Heydər Əliyev ermənilərin Azərbaycan xalqına qarşı həyata keçirdiyi milli qırğına siyasi qiymət verib. Azərbaycan Respublikası Prezidentinin 1998-ci il 26 mart tarixli Fərmanı ilə 31 Mart - Azərbaycanlıların Soyqırımı Günü elan edilib.
Tədbirin sonunda 1918-ci ildə Şamaxıda törədilən qanlı hadisələrdən bəhs edən sənədli film göstərilib.
X X X
Ağsuda 31 Mart - Azərbaycanlıların Soyqırımı Gününə həsr edilən yığıncaq olub.
AZƏRTAC xəbər verir ki, rayon icra hakimiyyətində keçirilən yığıncaqda xalqımıza qarşı zaman-zaman törədilən qətliamlar, bu qətliamları törədənlər barədə konkret tarixi faktlar bir daha diqqətə çatdırılıb. Vurğulanıb ki, 1828-ci il martın 21-də rus imperatoru birinci Nikolayın İrəvan və Naxçıvan xanlıqlarının əraziləri hesabına “erməni vilayəti” yaradılması barədə fərmanı bu yerlərə ermənilərin köçürülməsinə gətirib çıxarıb və bu, yerli sakinlər olan azərbaycanlılar üçün gələcək dəhşətli günlərin əsasını qoyub. Xüsusilə XX əsrin əvvəllərindən etibarən ermənilər xalqımıza qarşı planlı surətdə etnik təmizləmə aparıb və bu zaman kütləvi qətliamlar törədiblər. Təkcə 1918-ci ilin mart-aprel aylarında Stepan Şaumyanın rəhbərliyi ilə həyat keçirilən növbəti qətliamlarda Ağsu ərazisinin də daxil olduğu Şamaxı qəzasında kəndlər dağıdılıb, insanlar kütləvi surətdə vəhşicəsinə öldürülüblər. Xocalı soyqırımı isə erməni vəhşiliklərinin növbəti mərhələsi olub.
Çıxışlarda ədalətin, haqq işinin gec-tez öz yerini tutacağı vurğulanıb, Prezident İlham Əliyevin gərgin və məqsədyönlü fəaliyyətinin, uğurlu xarici siyasət xəttinin məhz bunu söyləməyə əsas verdiyi diqqətə çatdırılıb.
Tədbirdə Şaumyanın, Andranikin və Lalayanın azərbaycanlılara qarşı kütləvi qətliamlarla əlaqədar vəhşi planlarından bəhs edən, tarixi faktlara əsaslanan sənədli film göstərilib.
X X X
31 Mart - Azərbaycanlıların Soyqırımı Günü ilə əlaqədar İsmayıllı sakinləri “Ana harayı” abidəsini ziyarət edib, önünə gül dəstələri qoyublar.
AZƏRTAC xəbər verir ki, anım mərasimində dövlət qulluğu veteranı Valeh Salehov son iki yüz ildə ermənilər tərəfindən azərbaycanlılara qarşı aparılan soyqırımı hadisələrindən danışıb. Vurğulanıb ki, vaxtilə Şamaxı və Göyçay qəzalarının tərkibində olan İsmayıllıda da dəhşətli qırğınlar törədilib. Tircan kəndində 360, Mücüdə 230, Bizlanda 200 nəfər erməni daşnakları tərəfindən qətlə yetirilib. Sərdahar, Zərnəva, Xankəndi, Maçaxı, Tağlabiyan, Kəlfərəc, Qıçatan, Sulut və Zeyvə kəndləri də daxil olmaqla, minən çox insan soyqırımı qurbanı olub.
Mərasimdəki çıxışlarda ümummilli lider Heydər Əliyevin ikinci dəfə hakimiyyətə gəlməsindən sonra soyqırımı hadisələrinə siyasi qiymət verildiyi diqqətə çatdırılıb.
Çıxış edənlər Prezident İlham Əliyevin rəhbərliyi ilə Azərbaycanın getdikcə artan iqtisadi və hərbi qüdrətindən iftixarla danışıb, xalqımıza qarşı törədilən qətliamlara görə ermənilərin gec-tez cavab verəcəklərini bildiriblər.
Bölmənin digər xəbərləri
