Bakı, 9 sentyabr, AZƏRTAC

Son aylar ərzində zəncirvari formada baş verən təxribatların müqayisəli təhlili deməyə əsas yaradır ki, Ermənistan xarici havadarlarının dəstəyinə söykənərək, 44 günlük Vətən müharibəsində itirdiklərinə görə qisas almaq niyyətinə düşüb. İşğalçı dövlət bu istəklərini reallaşdırmaq üçün böyük bir təxribat planı hazırlayıb. Həmçinin Ermənistan real döyüş meydanında Azərbaycanla qarşılaşmaqdan qorxduğu üçün öz istəklərini təxribatlar formasında realizə etməyə çalışır. Ermənistan Silahlı Qüvvələrinin qoşun hissələrinin Azərbaycanla delimitasiya olunmamış dövlət sərhədində, Qarabağ bölgəsinə yaxın ərazilərdə, həmçinin Naxçıvan Muxtar Respublikası istiqamətində cəmləşdirilməsi də bu ölkənin hərbi təxribatlara əsaslanan planının tərkib hissəsidir.

Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.

“Nəzərə almaq lazımdır ki, müasir müharibələr hibrid və ya asimmetrik modeldə həyata keçirilir. Yəni, müharibələr döyüş meydanları ilə yanaşı, həm də diplomatiya və informasiya savaşı formasında reallaşdırılır. Ermənistanın diplomatik platformalarda və informasiya savaşı müstəvisində Azərbaycana qarşı həyata keçirdiyi destruktiv siyasətini onun sərhəd xəttində törətdiyi hərbi təxribatları ilə uzlaşdırsaq görərik ki, hazırda bu dövlət Azərbaycana qarşı tammiqyaslı asimmetrik müharibə aparır. Belə ki, bu prosesdə Ermənistanın hiyləgər, riyakar davranışlarının elementləri görünür. Onlar öz təxribatları ilə Azərbaycanı hərbi əməliyyatlara sövq edir. Yəni, Azərbaycanı öz sərhədlərini qorumaq üçün hansısa cavab addımları atmaq məcburiyyətində qoyur, yekunda isə Ermənistan sərhəddə yaşanan təxribatları dövlətimizin adına yazmağa çalışır. Eyni zamanda, təsir dairələrində olan transmilli KİV-lərdən faydalanaraq, mövzu üzrə yalançı, uydurma informasiyalar yayırlar. Beynəlxalq ictimaiyyəti inandırmaq istəyirlər ki, yeni müharibə təşəbbüsü Azərbaycandan qaynaqlanır.

“Erməni şəbəkəsi”nin Laçın-Xankəndi yolu üzərində qurduqları oyunlar da bu planın tərkib hissəsidir. Onlar Laçın yoluna dəhliz statusu verilməsini, Ermənistanın bu yolda sərbəst hərəkət imkanları qazanmasını, bölgədəki separatçılarla vasitəsiz kommunikasiya qurulmasını istəyirlər. Bunun üçün ermənilər cari ilin iyul-avqust ayları ərzində təkidli tələblərlə çıxış etdilər. Öz hərəkətlərinə bəraət qazandırmaq üçün Qarabağ regionunda “humanitar böhran” yaşanması barədə yalançı iddialar irəli sürərək qlobal kampaniya həyata keçirdilər. Beynəlxalq ictimaiyyətin diqqətini bu mövzuya yönəltmək üçün iyulun 27-də “Qarabağa humanitar yük daşımaq” adı altında 19 maşınından ibarət karvanı “Laçın” dövlət sərhəd-buraxılış məntəqəsinə göndərdilər. Avqustun 16-da isə “Laçın dəhlizi” mövzusunu BMT Təhlükəsizlik Şurasının müzakirəsinə çıxardılar, Azərbaycana qarşı sanksiyalar tətbiq etdirməyə çalışdılar. Buna baxmayaraq, Azərbaycan faktlarla sübut etdi ki, Qarabağ regionunda hər hansı humanitar böhran yaşanmır. Laçında süni yaradılmış gərginlik isə bu məntəqənin 2023-cü il iyunun 15-də Ermənistan silahlı qüvvələri tərəfindən atəşə tutulması, Azərbaycan əsgərinin yaralanması ilə bağlı olub. Yəni, məsələnin kökündə Ermənistanın təxribatçı və təhrikçi hərəkətləri dayanır”, - deyə ekspert qeyd edib.

O bildirib ki, Ermənistanın hiyləgərlik və riyakarlıq üzərində qurulmuş “qisas planı”nın daha bir elementini ölkənin baş naziri Nikol Paşinyan üzə çıxardı. Belə ki, sentyabrın 2-də Ermənistanda qondarma “Artsax Respublikasının müstəqilliyinin 32 illiyi”nin qeyd edilməsinə təşəbbüs göstərildi. Qondarma “Artsax Respublikası”na “Müstəqillik günü təbriki” göndərənlər sırasında Ermənistanın baş naziri Nikol Paşinyan da var idi. Hansı ki, iyulun 25-də açıqlama verib Azərbaycanın 86,6 min kvadrat kilometrlik ərazisi daxilində Qarabağ regionunu da tanıdığını deyən Ermənistanın baş naziri Nikol Paşinyanın sentyabrın 2-də qondarma “DQR xalqını” müstəqillik günü münasibətilə təbrik etməsi onların paradoksal davranışlarını ifşa etmiş oldu. O, bu davranışla guya sülh danışıqları prosesinə töhfə verdiyini göstərməyə çalışmışdı. Nəticə olaraq bu qənaət yaranır ki, Ermənistan təmsilçiləri beynəlxalq ictimaiyyətə sülhlə bağlı bir söz deyirlər, gerçəklikdə isə fərqli davranırlar.

Bu faktlara əsaslanıb demək olar ki, son aylar ərzində Ermənistanla Azərbaycan arasında gərginliyin və sərhəddə təxribatçı əməllərin artmasının, sülh danışıqlarının pozulmasının səbəbkarı Ermənistandır. Onlar 44 günlük Vətən müharibəsində itirdiklərinə görə qisas almaq məqsədilə təxribatlar törədirlər. Amma məsuliyyəti Azərbaycanın üzərinə atmaqla beynəlxalq ictimaiyyəti çaşdırmağa çalışırlar. Azərbaycan isə öz məntiqli hərəkətləri ilə həm düşmənin təxribatçı əməllərinə layiqli cavab verir, həm də ermənilərin hiyləgər simasını ifşa edir.