Ermənistanın mina terroru Rusiya sülhməramlı kontingentinin gözü önündə baş verir - Hərbi ekspert
Bakı, 23 aprel, AZƏRTAC
Ermənistan son 30 il ərzində Qarabağ və Şərqi Zəngəzur iqtisadi rayonlarımızı işğal altında saxlamaqla kifayətlənməyib, həm də bu əraziləri mina tarlasına çevirməklə həmin ərazilərdə xeyli sayda insanlarımızın həyat və sağlamlığına ziyan vurub. Son 32 ildə Azərbaycan 3 min 360-dan çox vətəndaşı Ermənistan tərəfindən basdırılan minalarının qurbanına çevrilib. Onlardan 294 nəfəri müharibə başa çatdıqdan sonraki dövrdə xəsarət alıblar və ya həyatlarını itiriblər.
Bu fikirləri AZƏRTAC-a açıqlamasında hərbi ekspert Ədalət Verdiyev söyləyib.
Onun sözlərinə görə, müharibə başa çatdıqdan və birgə bəyanat imzalandıqdan sonra da Ermənistan ərazilərimizə öz istehsalı olan minaları basdırmaqda davam edib və bu proseslər Azərbaycan ərazisində müvəqqəti yerləşdirilmiş Rusiya sülhməramlı kontingentinin gözü önündə baş verib. Yollar erməni silahlılarının nəzarətində olarkən ruslar və Qarabağda mövcud olan ermənilər tərəfindən aktiv istifadə olunur və kimsə minaya düşmürdü. Bu isə ondan xəbər verir ki, müvafiq ərazilər Azərbaycan Ordusunun hissə və bölmələri həmin kəndlərin ərazisinə yerləşdikdən sonra minalanıb.
Ədalət Verdiyev qeyd edib ki, Şuşa rayonunun Allahqulular kəndi istiqamətindəki torpaq yol 2023-cü il martın 25-dək ermənilərin və rusların nəzarətində olub və o kənddə mina partlayışı hadisəsi barədə eşitməmişdik. Amma Azərbaycan Ordusu o ərazilərə yerləşdikdən sonra belə təxribatlar törədilirsə, deməli, həmin ərazilərin ordumuz ora yerləşdikdən sonra Ermənistan kəşfiyyat-diversiya qrupları tərəfindən minalanması ehtimalını nəzərdən qaçırmamalıyıq. Azərbaycan ərazisində müvəqqəti yerləşdirilmiş Rusiya sülhməramlı kontingentinin erməni təxribatlarına səssiz qalması və bu proseslərin qarşısının alınması üçün tədbirlər görmək əvəzinə erməni silahlılarına kuryerlik etməsi onların Azərbaycan ərazisindən vaxtından əvvəl çıxarılmasını labüd edir.
“Ərazilərin Azərbaycanın nəzarətinə keçdikdən sonra həmin minaların həm azərbaycanlıların istifadə etdiyi yerlərə basdırılması faktı ilə biz ilk dəfə deyil rastlaşırıq. Xatırlayırsınızsa, daha əvvəl də xidməti vəzifələrin icrası ilə əlaqədar Kəlbəcər rayonuna ezam olunan AZƏRTAC-ın müxbiri Məhərrəm İbrahimov və AzTV-nin operatoru Sirac Abışov, Kəlbəcər Rayonunun İcra Hakimiyyətinin Susuzluq kənd inzibati ərazi dairəsi üzrə nümayəndəsinin müavini Arif Əliyev 2021-ci il iyunun 4-də mina terroru zamanı həlak olublar. O hadisələrdən təxminən iki ilə yaxın vaxt ötür, amma Ermənistan yenə də özünə xas olan mina və terror təxribatlarını davam etdirir.
Qeyd edək ki, hərbi təyinatlı yüklərin, o cümlədən canlı qüvvə, silah-sursat, minaların Ermənistandan Azərbaycan ərazisindəki qeyri-qanuni erməni silahlı dəstələri üçün daşınması Rusiya sülhməramlılarının şərait yaratması ilə həyata keçirilir. Odur ki, həm Rusiyalı kontingenti, həm Ermənistan rəhbərliyi, həm də Qarabağdakı separatçıların təlxək toplusu nəzərə almalıdır ki, Azərbaycan vətəndaşlarına qarşı törədilən bu qanlı mina terror hadisəsi cavabsız qalmayacaq. Baş verən bu təxribatlar Ermənistanın hazırda ən çox ehtiyac duyduğu təhlükəsizlik problemlərini onun üçün daha da qabardacaq və regionda sülhün əldə olunmasına kifayət qədər böyük zərbə vuracaq. Rusiyalı sülhməramlı kontingenti nəzarətindəki ərazilərdə baş verən proseslərə görə Ermənistanla birlikdə cavabdehlik daşımalıdır”, - deyə ekspert vurğulayıb.
Bölmənin digər xəbərləri
