FARS KÖRFƏZİNDƏKİ ƏRƏB ÖLKƏLƏRİNİN NEFTDƏN GƏLİRİ İLİN SONUNADƏK 300 MİLYARD DOLLAR OLACAQ

30.09.2004 [20:53]
Çap et
A⁺ A^-

Fars körfəzindəki altı ərəb ölkəsinin öz neftinin xarici bazarda satışından gəlirləri ilk dəfə olaraq bu il 300 milyard dollar səviyyəsinə qalxacaqdır. AZƏRTAC-ın İTAR-TASS-dan aldığı xəbərə görə, Səudiyyə Ərəbistanının iqtisadiyyat sahəsində nüfuzlu təhlilçisi İhsan Əbu Haliq bildirmişdir ki, dünya bazarında neftin dəyərini indiki rekord göstəriciyə gətirib çıxaran amillərin davam etməsi ilə əlaqədar bu yanacağın qiyməti gələcəkdə də artacaqdır.

Ekspertin fikrincə, dünyada ilk dəfə olaraq elə bir vəziyyət yaranmışdır ki, indi enerji xammalının dəyərini təklif deyil, tələb müəyyənləşdirir. Onun proqnozuna görə, bütün gələn il ərzində bir barrel neftin dəyəri 30 dollar səviyyəsindən aşağı düşməyəcəkdir.

Əbu Haliq demişdir ki, Fars körfəzinin ərəb ölkələrinə “neft dolları”nın görünməmiş axını və ərəb kapitallarının ABŞ banklarından geri götürülməsinin davam etməsi nəticəsində regionda inflyasiya artacaqdır. O, inflyasiyanı cilovlamaq üçün kapitalı infrastrukturun inkişafına, ilk növbədə, energetika sektoruna, xaricdə, əsasən, qonşu ərəb ölkələrində sərmayələrin artırılmasına yönəltməyi məsləhət görür.

FARS KÖRFƏZİNDƏKİ ƏRƏB ÖLKƏLƏRİNİN NEFTDƏN GƏLİRİ İLİN SONUNADƏK 300 MİLYARD DOLLAR OLACAQ

MÜƏLLİFLƏ ƏLAQƏ

Bölmənin digər xəbərləri