Bakı, 31 oktyabr (AZƏRTAC). Beynəlxalq Futbol Federasiyasının (FİFA) rəhbəri Yozef Blatter Madridin “Real” klubunun hücumçusu Kriştianu Ronaldu barəsində dediyi sözlərə görə, komandadan üzr istəmişdir. AZƏRTAC xarici KİV-lərə istinadla xəbər verir ki, Blatterin Ronaldu barəsində dediyi sözlər geniş əks-sədaya səbəb olmuşdur.

Bundan əvvəl Blatter Ronaldudan daha çox “Barselona”nın hücumçusu Lionel Messiyə rəğbət bəslədiyini demişdi, çünki Ronaldu öz saç düzümünə həddən artıq aludə olmuşdur.

Blatterin bu sözlərindən sonra məşqçi Karlo Ançelottinin bəyanatı “Real”ın saytında dərc edilmişdir. Ançelotti beynəlxalq federasiyanın rəhbərinin Messini Ronaldudan yaxşı futbolçu hesab etməsi faktından narazı olduğunu bildirmişdir. Madrid klubunun prezidenti Florentino Peres FİFA-ya məktub göndərərək bu vəziyyətə aydınlıq gətirilməsini xahiş etmişdir.

Az sonra Yozef Blatter cavab göndərmiş və həmin cavab “Real”ın rəsmi saytında dərc edilmişdir.

Blatter yazır: “Mən Oksford universitetində dediyim sözləri izah etmək istərdim. Mənim məqsədim “Qızıl top” mükafatına namizədləri müzakirə etmək olmamışdır. Çıxışımın sonunda aparıcı məndən Messi ilə Ronaldu arasında seçim aparmağımı xahiş etmişdir. Bəli, mən argentinalı futbolçunu seçmişdim, lakin mənim üçün Ronaldu da Messi kimi top-futbolçudur. Onlar hərəsi özünə görə görkəmli oyunçulardır”.

FİFA-nın rəhbəri daha sonra yazır: “Mənim çıxışımın anlaşılmazlığa səbəb olmasına görə təəssüflənirəm və buna görə üzr istəyirəm. Mən “Real”a, onun oyunçularına və azarkeşlərinə hörmətsizlik etmək istəməmişəm. Mən hələ uşaq yaşlarımdan bu kluba heyranam”.

Xatırladaq ki, dalbadal dörd il “Qızıl top” mükafatına layiq görülmüş argentinalı Messi də, portuqaliyalı Ronaldu da ilin ən yaxşı oyunçusu mükafatına iddiaçıların qısa siyahısına daxil edilmişdir.