“FİTOSANİTAR NƏZARƏTİ HAQQINDA” QANUN LAYİHƏSİ ÜÇÜNCÜ OXUNUŞA HAZIRDIR

21.04.2006 [20:45]
Çap et
A⁺ A^-

AZƏRTAC xəbər verir ki, Milli Məclisin aqrar siyasət daimi komissiyasının aprelin 21-də keçirilmiş iclasında “Fitosanitar nəzarəti haqqında” qanun layihəsi üçüncü oxunuşda müzakirə olunmuşdur. Komissiyanın sədri Eldar İbrahimov demişdir ki, layihənin parlamentdə birinci oxunuş müzakirəsi zamanı bir sıra irad və təkliflər səslənmişdir. İşçi qrupu onların hamısını qruplaşdırmış və əksəriyyətini nəzərə almışdır. Müzakirəyə təqdim olunmuş sənəd üslub və mahiyyət baxımından da əsaslı surətdə təkmilləşdirilmiş, layihəyə bəzi müddəalar əlavə olunmuşdur.

Sonra Milli Məclis Aparatının iqtisadi qanunvericilik şöbəsi müdirinin müavini - aqrar qanunvericilik bölməsinin müdiri Şahmərdan Kərimov layihə ilə bağlı ətraflı məlumat vermişdir. Bildirmişdir ki, ikinci oxunuşdan sonra layihəyə “fitosanitar nəzarətin təşkili” adlı maddə əlavə edilmiş, 6 maddədə isə bir sıra dəyişikliklər olunmuşdur. Qanun Azərbaycan Respublikası ərazisində fitosanitar nəzarətin təşkilinin və həyata keçirilməsinin hüquqi əsaslarını müəyyən edəcək, bitki mühafizəsi və karantini sahəsində fəaliyyət göstərən subyektlər arasındakı münasibətləri tənzimləyəcəkdir. Hazırkı variantda qanun qarşıya qoyulmuş məqsədə çatmağa imkan verəcəkdir.

Müzakirələr zamanı deputatlar layihəyə edilmiş dəyişiklikləri müsbət dəyərləndirmiş və onun üçüncü oxunuşun tələblərinə cavab verdiyini vurğulamışlar.

Sonda qanun layihəsinin Milli Məclisin müzakirəsinə çıxarılması qərara alınmışdır.