Fransa Senatının qəbul etdiyi qətnamə sülh prosesinə zərbədir
Bakı, 18 noyabr, AZƏRTAC
Bu gün Azərbaycan yaranmış yeni reallıqları dünya ictimaiyyətinə bəyan edərək bu istiqamətdə çoxvektorlu xarici siyasətdən istifadə etməklə bütün vacib platformalarda öz mövqeyini qətiyyətlə qorumaqdadır. Azərbaycanın xarici siyasətində önəmli istiqamət hər hansı bir ölkənin balacalığı, böyüklüyü ilə bağlı deyil, əsasən həmin ölkənin dünyanın formalaşan yeni siyasi arxitekturasında müəyyənləşdirdiyi yeri ilə bağlıdır. 2020-ci ildən, yəni, İkinci Qarabağ - Vətən müharibəsindən sonra Azərbaycan Cənubi Qafqazda yeni reallıqların yaranmasına imza atdı. Əldə olunan möhtəşəm Zəfər vasitəsilə ölkəmiz Birləşmiş Millətlər Təşkilatının beynəlxalq platformalardakı çoxillik fəaliyyətini nümayiş etdirərək qəbul olunmuş məlum 4 qətnamənin icrasını təmin etdi. Beləliklə, həm regionda, həm də dünya siyasətində tamamilə yeni bir ab-hava yaratmağa nail oldu.
Cari ildə gördüyümüz ondan ibarətdir ki, postmüharibə dövrünün öz çağırışları, yanaşmaları var. Bu baxımdan Azərbaycan 30 illik xarici siyasətində artıq bəzi məsələlərdə yeni yanaşma tətbiq edir. Azərbaycanın və xalqının milli maraqlarının təmin olunması üçün Prezident İlham Əliyev bütün ikitərəfli və çoxtərəfli görüşlərdə sülhə, əmin-amanlığa, firavan gələcəyə doğru öz qətiyyətli mövqeyini ortaya qoyur. Lakin bəzi dövlətlərin, xüsusilə də Fransanın həm danışıqlarda yer alaraq tamamilə başqa bir gündəliyi müzakirə etməsi, eyni zamanda, sonradan müxtəlif vasitələrlə Azərbaycanı işğalda ittiham etməsi, bu məsələlərdə artıq başqa maraqların ortaya çıxması siyasi riyakarlıq, habelə bir siyasətçi kimi Makronun Azərbaycan-Fransa münasibətlərinə qarşı etdiyi xəyanət, hörmətsizlikdir.
Bu fikirləri Milli Məclisinin deputatı Məzahir Əfəndiyev AZƏRTAC-a açıqlamasında bildirib.
Fransa-Azərbaycan münasibətlərinin son 30 ildə prinsip etibarilə ancaq və yalnız inkişafa doğru kökləndiyini diqqətə çatdıran deputat deyib: “Bu münasibətlərdə Azərbaycan hər zaman Fransanı Avropanın mədəni paytaxtı olaraq bir sıra məsələlərdə, yaradılan mexanizmlərdə daha çox dəstəkləməyə çalışıb. Baxmayaraq ki, Azərbaycan postmüharibə dövründə Sülh Sazişinin imzalanması üçün Fransanın iştirakına, onun öz sülhməramlı missiyasını yerinə yetirməyə imkan yaratdı, biz nəticədə Fransa Prezidentinin həmin əldə olunmuş fürsətdən istifadə etməkdənsə Azərbaycanı qaralamaqla məşğul olduğunun şahidi olduq.
Hər bir siyasi liderə müvəffəq olmur ki, o, öz xalqının maraqlarını təmin etmək üçün düzgün qərarlar versin. Təəssüf olsun ki, Emmanuel Makronun Azərbaycanla bağlı münasibətlərdə ortaya qoyduğu səriştəsiz mövqe bu günə qədər formalaşmış münasibətlərə böyük zərbə vurur. Hətta Fransa artıq Avropa İttifaqının daxilində belə söz sahibliyini itirir. Bu, Fransa liderinin mövcud məsələlərə qeyri-adekvat münasibət göstərdiyinin əyani sübutudur”.
Məzahir Əfəndiyevin sözlərinə görə, keçdiyimiz günlərdə Fransa Senatının Azərbaycan əleyhinə qəbul etdiyi, özündə beynəlxalq hüququn norma və prinsiplərinə zidd olan, qeyri-səmimi, o cümlədən riyakar mövqe ehtiva edən qətnamə Fransa ilə Azərbaycan arasında götürülmüş ikitərəfli öhdəliklərin kobud şəkildə pozulması, uzun illərdir davam edən həm siyasi, həm də iqtisadi münasibətlərin sual altına qoyulmasıdır.
“Bu, nəinki Fransa-Azərbaycan münasibətlərinə, eyni zamanda, bu günə qədər Avropa İttifaqı vasitəsilə həyata keçirilmiş bütün görüşlərdə 2020-ci il noyabrın 10-da imzalanmış üçtərəfli Bəyanatın bütün bəndlərinin tam icra olunması ilə bağlı əldə olunmuş birgə razılaşmalara, bu istiqamətdə göstərilən səylərə, ümumiyyətlə sülh istiqamətində atılan bütün addımlara böyük zərbə, beynəlxalq hüququn norma və prinsiplərinə qarşı edilən saymazlıq, hörmətsizlikdir.
Qəbul olunmuş qətnamə Azərbaycan xalqının hiddətinə səbəb olmuş, Milli Məclisin də deputatları tərəfindən Fransa-Azərbaycan münasibətlərinin dayandırılması, mövcud əlaqələrə yenidən baxılması kimi radikal fikirlər, təkliflər səsləndirilmişdir. Azərbaycan Respublikası Parlamentinin Fransanın davamlı antiazərbaycan fəaliyyətini nəzərə alaraq qəbul etdiyi 2022-ci il 16 noyabr tarixli Bəyanat hesab edirəm ki, Azərbaycan xalqının fikirlərini əks etdirir, habelə bu gün ölkəmizə qənim kəsilən qüvvələrə açıq xəbərdarlıqdır”, - deyən deputat fikirlərini yekunlaşdırıb.
Bölmənin digər xəbərləri
