FRANSADA AVTOBUSUN QƏZAYA UĞRAMASI 7 ŞAGİRDİN ÖLÜMÜNƏ VƏ 25-NİN YARALANMASINA SƏBƏB OLMUŞDUR
AZƏRTAC-ın xüsusi müxbiri xəbər verir ki, Fransanın Ot-Savua departamentindəki Marjensel kollecinin şagirdlərini aparan avtobusun qatarla toqquşması 7 uşağın həyatına son qoymuş, 25-nin yaralanmasına səbəb olmuşdur.
Kollecin 11-13 yaşlı şagirdləri tarix fənni üzrə ekskursiyaya gedirmişlər. Onları aparan sürücü sürəti azalda bilmədiyindən avtobus qatarla toqquşmuşdur. Yaralı şagirdlərin arasında 3-nün vəziyyətinin daha ağır olduğu bildirilir.
Hadisə yerinə gəlmiş polislər təşkilatçı müəllimi tapa bilməmişlər. Uzun axtarışdan sonra intihar etmiş müəllimi yaxınlıqdakı meşədə ağacdan asılı vəziyyətdə tapmışlar.
Sürücü ilkin dindirilmə zamanı onun yolunun açıq olduğunu bildirən yaşıl işığın yandığını bəyan etmişdir. Hadisənin şahidləri onun dediklərini təsdiq etmişlər. Heç bir yana getməmək şərtilə sürücü müvəqqəti olaraq sərbəst buraxılmışdır.
Bölmənin digər xəbərləri
