G7 ölkələri Rusiyaya qarşı sanksiyaların saxlanması və Ukraynaya dəstək məsələlərini müzakirə edəcəklər
Bakı, 10 may, AZƏRTAC
“Böyük Yeddilik” (G7) ölkələrinin liderləri Yaponiyada keçiriləcək sammitdə Rusiyaya qarşı müxtəlif məhdudlaşdırıcı tədbirlərin saxlanması, eləcə də Ukraynaya dəstək kimi məsələləri müzakirə edəcəklər.
AZƏRTAC xəbər verir ki, bu barədə Yaponiyanın ABŞ-dakı səfiri Koji Tomita bildirib.
“Sammitdə bir neçə məsələ, o cümlədən Ukrayna münaqişəsinin müzakirəsi prioritet olacaq. Liderlər, şübhəsiz ki, Ukraynaya güclü dəstəyin davam etdirilməsini, həmçinin bu ölkədə infrastrukturun yenidən qurulması və bərpasını müzakirə edəcəklər”, - diplomat Vaşinqtonda keçirilən mətbuat konfransında qarşıdan gələn G7 sammitinin gündəliyini şərh edərkən bildirib.
Qeyd edək ki, Yaponiyanın bu il sədrlik etdiyi G7 liderlərinin görüşü mayın 19-21-də Xirosimada keçiriləcək.
Bölmənin digər xəbərləri
