DÜNYA
Gələn həftə Slovakiyada yeni hökumətin tərkibi elan ediləcək
Vyana, 10 may, AZƏRTAC
Slovakiyanın Baş naziri Eduard Heqerin istefasından sonra müvəqqəti hökuməti təşkil etmək üçün dövlət başçısı Zuzana Çaputovadan mandat alan Milli Bankın sədr müavini Lüdovit Odor yeni hökumətin gələn həftə elan ediləcəyini bildirib.
AZƏRTAC xəbər verir ki, 46 yaşlı maliyyə eksperti L.Odor mayın 14-dən Milli Bankdakı bütün funksiyalarını dayandıracaq və həmin tarixə kimi müvəqqəti hökumətin tərkibinə dair heç bir açıqlama verməyəcək.
Qeyd edilməlidir ki, Z.Çaputova L.Odorun rəhbərliyi altında “ekspertlər hökuməti”nin qurulmasına razılıq verib. Onun əsas şərtlərindən biri də ondan ibarət olub ki, bu hökumətdə təmsil olunan şəxslər sentyabrın 30-da keçiriləcək parlament seçkilərində namizədliyini irəli sürməsin. Bu yolla hökumət funksiyalarından seçki kampaniyası üçün sui-istifadə edilməsinin qarşısı alınmalıdır.
Müvəqqəti hökumətin andiçmə mərasimi gələn həftə keçiriləcək, dəqiq gün isə hələlik elan edilməyib.
Elgün Niftəli
AZƏRTAC-ın xüsusi müxbiri
Vyana