GƏLƏN İL TƏHSİL NAZİRLİYİNİN XƏTTİ İLƏ 300-Ə YAXIN MƏKTƏB BİNASI TİKİLƏCƏK

12.11.2006 [17:44]
Çap et
A⁺ A^-

Təhsil naziri Misir Mərdanov AZƏRTAC-ın müxbirinə demişdir ki, dövlət büdcəsindən təhsilin inkişafı üçün ayrılan vəsaitin məbləği ilbəil artırılır. 2007-ci ildə təhsil üçün nəzərdə tutulmuş vəsait cari illə müqayisədə 47 faiz çoxdur. Bu vəsatin bir hissəsi nazirliyin xətti ilə tikiləcək 300-ə yaxın məktəb binasının maliyyələşməsinə yönəldiləcəkdir.

Nazir bildirmişdir ki, son 3 ildə respublikada 735 ümumtəhsil məktəb binası tikilmiş, 785 təhsil ocağı isə əsaslı təmir edilmişdir. Cari ilin sonunadək 188 məktəb binasının tikintisi nəzərdə tutulmuşdur.

M.Mərdanov onu da qeyd etmişdir ki, Heydər Əliyev Fondunun təşəbbüsü ilə 132 məktəb binası tikilmiş və daha 100-nün inşası nəzərdə tutulmuşdur.

Məktəblərin maddi-texniki bazasının möhkəmləndirilməsi, lazımi avadanlıq və pulsuz dərs vəsaitləri ilə təmin olunması üçün də vəsait ayrılmışdır.

Növbəti ildə müəllimlərin əmək haqları, təqaüdlər, elmi adlara və dərəcələrə görə verilən müavinətlərin məbləği də artırılacaqdır.