Şəki, 6 dekabr, Mustafa Dadaşov, AZƏRTAC

Gənclər və İdman Nazirliyinin dəstəyi, “İrəli” İctimai Birliyinin təşkilatçılığı ilə keçirilən “Gənc bələdçi” layihəsi Şəki şəhərində davam edir.

AZƏRTAC-ın bölgə müxbiri xəbər verir ki, ümumilikdə, 4 regionda 100-dən çox gənci əhatə edəcək layihə çərçivəsində artıq İsmayıllı və Qəbələ şəhərlərində gənclər üçün təlim proqramları uğurla başa çatıb. Şəki şəhərində təşkil edilən 4 günlük təlim proqramında iştirakçılara “tur və düşərgələrin planlanması”, “ekstremal vəziyyətlərin idarə edilməsi”, “ekoturlar üçün marketinq strategiyaları və multimedia hesablarından məqsədyönlü istifadə”, “maliyyə menecmenti”, “özünəməşğulluq” və digər mövzularda təlimlər keçirilir.

Təlimlərlə yanaşı, iştirakçıların Dövlət Turizm və Dövlət Məşğulluq agentliklərinin nümayəndələri ilə görüşləri təşkil olunur, regionlarda məşğulluq və turizm potensialları, fürsətlər, proqramlar barədə infosessiyalar keçirilir.

Layihənin koordinatoru Nigar Əliyeva AZƏRTAC-ın bölgə müxbirinə açıqlamasında bildirib ki, turizm və bələdçilik sahələri istiqamətində gənclərin fərdi inkişafına yönəlmiş layihənin əsas məqsədi yeni ekoturizm təşəbbüslərinin yaradılması, Azərbaycanın zəngin mədəni və tarixi irsinin təbliğ olunması, ətraf mühitin qorunması, bölgələrə yerli və xarici turistlərin cəlb olunması, gənclərin məşğulluğunun artırılması və gənc bələdçilərin formalaşdırılmasıdır. “Gənc bələdçi” layihəsi gənc iştirakçıların bilik və bacarıqlarının artırılmasını, gənclərdə təkmilləşdirilmiş turizm təcrübələrilə nəticələnən mədəni və tarixi məlumatlılığın artırılmasını və ekoturizm infrastrukturunun və xidmətlərinin inkişafını hədəfləyir.

Növbəti təlimlərin Lənkəran şəhərində həyata keçirilməsi nəzərdə tutulur.