GƏNCLƏR İŞİ İLƏ BAĞLI BEYNƏLXALQ TƏLİM KURSU ÖZ İŞİNƏ BAŞLAMIŞDIR
AZƏRTAC xəbər verir ki, sentyabrın 29-da Zuğulba İstirahət Mərkəzində “Gənclər işinin milli səviyyədən beynəlxalq səviyyəyə inkişafı” mövzusunda Beynəlxalq Təlim Kursunun açılış mərasimi keçirilmişdir. Azərbaycan, Gürcüstan, Fransa, Belçika, Yunanıstan, İsveç, Serbiya və Çernoqoriyadan olan nümayəndələrin iştirak etdiyi tədbirdə gənclər, idman və turizm nazirinin müavini İntiqam Babayev, Azərbaycan Respublikası Gənclər Təşkilatları Milli Şurasının sədri Fuad Muradov, Avropa Şurası Gənclər və İdman Direktorluğunun nümayəndəsi Jann Filipp və başqaları çıxış etmişlər. Onlar tədbirin əhəmiyyətindən, gənclərin dünya və Avropa strukturlarına inteqrasiyasındakı mövcud vəziyyətdən danışmışlar.
Natiqlər gənclərin fəaliyyətini yüksək qiymətləndirərək bütün bunların ölkəmizin başçısı İlham Əliyevin gənclərə göstərdiyi diqqət və qayğıdan qaynaqlandığını vurğulamışlar.
Beynəlxalq Təlim Kursu oktyabrın 5-dək davam edəcək.
