Gənclər və İdman Nazirliyi “Xəzər dalğası” dənizdə üzmə yarışı keçirəcək
Bakı, 17 iyun, AZƏRTAC
Su idmanı növlərinin təbliği, daha geniş yayılması və inkişaf etdirilməsi məqsədilə Gənclər və İdman Nazirliyi iyunun 26-da dənizdə (açıq suda) üzmə yarışı keçirəcək.
Gənclər və İdman Nazirliyinin mətbuat xidmətindən AZƏRTAC-a bildiriblər ki, açıq suda üzgüçülük yarışları açıq su hövzələrində (çaylar, göllər, dənizlər və okeanlar) müxtəlif məsafələrə təşkil edilir.
Nazirliyin yeni layihəsi olan “Xəzər dalğası” kütləvi yarışı Pirallahı qəsəbəsi, Nərəkənd parkında, peşəkarlar və həvəskarlar arasında beş yaş qrupunda (10-17, 18-29, 30-39, 40-49 və +50 yaş) təşkil olunacaq.
Yarış zamanı müxtəlif su idman növləri üzrə nümunəvi çıxışlar sərgilənəcək.
Üzməyi bacaran hər kəs yarışda iştirak edə bilər. Bunun üçün qeydiyyatdan keçmək və 25 manat iştirak haqqı ödəmək tələb olunur. Həmçinin xeyriyyə məqsədi daşıyan yarışdan əldə edilən vəsait “Kür” Olimpiya Tədris-İdman Mərkəzində şəhid övladları üçün üzgüçülük və avarçəkmə idman növləri üzrə yay düşərgəsinin təşkilinə sərf ediləcək.
Yerlər məhduddur və buna görə də iştirakçı sayı nəzərdə tutulan say həddinə çatdıqda qeydiyyat dayandırılacaq.
Yarışa qoşulmaq üçün https://swimming.smartscoring.com/ linki vasitəsilə qeydiyyatdan keçmək lazımdır.
Ətraflı məlumatı (050) 359-19-96 telefon nömrəsi vasitəsilə almaq mümkündür.
Bölmənin digər xəbərləri
