Gənclərə qan donorluğu ilə bağlı geniş məlumat verilib
Bakı, 28 oktyabr, AZƏRTAC
Oktyabrın 28-də Azərbaycan Texniki Universitetində Azərbaycan Qan Donorluğunun İnkişafı Mərkəzinin (AQDİM) təşkilatçılığı, həmçinin Milli Hematologiya və Transfuziologiya Mərkəzinin və Mərkəzi Qan Bankının birgə dəstəyi ilə “Sağlam olaq - Donor olaq” təbliğat-təşviqat tədbiri təşkil olunub.
Azərbaycan Qan Donorluğunun İnkişafı Mərkəzindən AZƏRTAC-a verilən xəbərə görə, tədbirdə Humanitar fənlər kafedrasının müdiri - filologiya üzrə fəlsəfə doktoru Həbib Mirzəyev, AQDİM-in İdarə Heyətinin sədri Fuad Rəsul, AQDİM-nin İdarə Heyəti sədrinin müavini, Dünya Narkotiklə Mübarizə Aparan İdmançılar Federasiyasının Azərbaycan Nümayəndəliyinin rəhbəri Cavid Allahverdiyev, həmçinin Milli Hematologiya və Transfuziologiya Mərkəzinin həkim-hematoloqu Sevinc Nəbiyeva, Mərkəzi Qan Bankının həkimi Fəridə Məmmədova mövzu ətrafında gənclər üçün geniş məruzə ilə çıxış ediblər.
Diqqətə çatdırılıb ki, Azərbaycan Qan Donorluğunun İnkişafı Mərkəzinin əsas məqsədi respublikada müvafiq dövlət orqanları və özəl sektorlarla qan donorluğu sahəsində yaxından əməkdaşlıq etmək,həmçinin Azərbaycanda qan donorluğu ilə bağlı gənclər arasında təbliğatın gücləndirilməsinə xidmət etməkdir.
Qeyd edək ki, qanvermə aksiyaları və təbliğat xarakterli tədbirlər Prezident İlham Əliyevin təsdiq etdiyi “Hemofiliya və talassemiyadan əziyyət çəkən uşaqlara qayğı” Dövlət Proqramına uyğun, həmçinin Heydər Əliyev Fondunun “Talassemiyasız həyat naminə” proqramı çərçivəsində təşkil olunur.
Bölmənin digər xəbərləri
