Görkəmli kamança ifaçısı Arif Əsədullayevin 75 illiyi qeyd edilib
Bakı, 21 yanvar, AZƏRTAC
Beynəlxalq Muğam Mərkəzində görkəmli kamança ifaçısı, Əməkdar incəsənət xadimi, sənətşünaslıq üzrə fəlsəfə doktoru, professor Arif Əsədullayevin anadan olmasının 75 illiyi qeyd edilib.
AZƏRTAC xəbər verir ki, Beynəlxalq Muğam Mərkəzinin direktoru, Əməkdar artist Sahib Paşazadə yubilyarı təbik edərək həyatının 50 ildən çoxunu sənətə həsr edən ifaçının yaradıcılığından, pedaqoji fəaliyyətindən və Əsədullayevlər ailəsinin Azərbaycan musiqi mədəniyyətində önəmli yer tutmasından söz açıb.
Bildirib ki, yubilyar ömrünü kamança sənətini öyrənməyə həsr edən, onun təbliğində böyük işlər görən bir sənətkar olaraq sevilir. Azərbaycan instrumental muğamlarını nota salan ilk ustad kamança ifaçısı və muğam bilicisi kimi milli musiqi xəzinəmizə gözəl ərməğan bəxş edib. Həyat fəaliyyətini kamança sənətinin təbliğinə və pedaqoji fəaliyyətə sərf etməklə ifaçılıq sahəsində də özünəməxsus yer qazanan sənətkar həm solo, həm də müşayiət ifalarında milli ifaçılıq xüsusiyyətlərini əks etdirir.
Üzeyir Hacıbəyli adına Bakı Musiqi Akademiyasında xalq musiqisinin tarixi və nəzəriyyəsi kafedrasında (müəllim, baş müəllim, dosent) professor vəzifəsində çalışmaqla təcrübəli pedaqoq kimi ərsəyə gətirdiyi elmi metodiki vasitələr muğam sənətinin qorunub saxlanılmasında, gələcək nəsillərə olduğu kimi dəyişikliklərə məruz qalmadan çatdırılmasında əvəzsiz elmi mənbədir.
Mədəniyyət nazirinin müşaviri Cahangir Səlimxanov çıxışında Arif Əsədullayevi təbrik edərək onun musiqi sahəsindəki xidmətlərindən söz açıb. Yubilyara milli musiqişünaslığımızın inkişafı yolunda yorulmaz fəaliyyətində uğurlar arzulayıb.
Sənətşünaslıq üzrə fəlsəfə doktoru Nuridə İsmayılzadənin aparıcılığı ilə keçən gecədə Üzeyir Hacıbəyli adına Bakı Musiqi Akademiyasının prorektoru, Əməkdar incəsənət xadimi, professor Gülnaz Abdullazadə, Milli Konservatoriyanın nəzdində Musiqi Kollecinin direktoru, Əməkdar incəsənət xadimi, professor Nazim Kazımov, professor Abbasqulu Nəcəfzadə çıxışlarında Arif Əsədullayevin elmi və pedaqoji fəaliyyətindən, zəngin ifaçılıq təcrübəsindən danışaraq onu təbrik ediblər.
Diqqətə çatdırılıb ki, Arif Əsədullayevin nota aldığı muğamlar müəllim və tələbələrin, geniş musiqi ictimaiyyətinin, bəstəkar və musiqişünaslıq ixtisasları üzrə təhsil alan tələbələrin arxalana biləcəyi çox lazımlı tədris vəsaitidir. Bu baxımdan “Kərəmi zərbli muğam”ının ifa prinsiplərini, texniki xüsusiyyətlərini mükəmməl bilən A.Əsədullayevin hazırladığı not nümunəsi də təqdirəlayiqdir.
Arif Əsədullayev tədbirin təşkilatçılarına və iştirakçılara təşəkkür edib.
Tədbir çərçivəsində yubilyara Təhsil İşçiləri Həmkarlar Təşkilatı tərəfindən elm və təhsil sahəsində səmərəli fəaliyyətinə görə fəxri fərman təqdim olunub.
Sonra Xalq artistləri Teyyub Aslanov, Gülyaz Məmmədova yubilyarın ömür-gün yoldaşı, Xalq artisti Şəfiqə Eyvazova, qızı - kamança ifaçısı Mehri Əsədullayeva, BMM-nin solistləri Əməkdar artist Arzu Əliyeva, xanəndələr Nisbət Sədrayeva və Murad Laçının ifaları dinlənilib.
Bölmənin digər xəbərləri
