Görkəmli musiqişünas alim Elmira Abasovanın 80 illik yubileyi qeyd olunmuşdur
Bakı, 6 mart (AZƏRTAC). Azərbaycan Bəstəkarlar İttifaqında (ABİ) görkəmli musiqişünas alim, Əməkdar İncəsənət Xadimi, professor Elmira Abasovanın 80 illiyinə həsr edilmiş elmi-praktiki konfrans keçirilmişdir.
ABİ-nin mətbuat xidmətindən AZƏRTAC-a bildirmişlər ki, konfransı giriş sözü ilə açan Bəstəkarlar İttifaqının sədri, Xalq Artisti, professor Firəngiz Əlizadə mərhum musiqişünas alimin Azərbaycan mədəniyyətinin inkişafındakı xidmətlərindən danışmışdır. Bildirmişdir ki, bir vaxtlar Bəstəkarlar İttifaqının katibi, Üzeyir Hacıbəyli adına Azərbaycan Dövlət Konservatoriyasının (indiki Bakı Musiqi Akademiyası) rektoru olmuş Elmira Abasova milli musiqi sənətimizdə böyük izlər qoymuş sənətkarlardan biridir. Onun dahi Üzeyir Hacıbəyli yaradıcılığına olan xüsusi məhəbbəti neçə-neçə monoqrafiya və əsərlərin ərsəyə gəlməsinə səbəb olmuşdur.
Elmi-praktiki konfransda Əməkdar İncəsənət Xadimi, sənətşünaslıq namizədi, professor Zemfira Qafarova “Üzeyir Hacıbəyli irsi E.Abasovanın əsas tədqiqat mövzusu kimi”, Əməkdar İncəsənət Xadimi, professor Oqtay Abasquluyev “E.Abasovanın çoxşaxəli fəaliyyəti barədə düşüncələr”, AMEA-nın müxbir üzvü, sənətşünaslıq doktoru Rəna Məmmədova “E.Abasovanın elmi işlərində milli özünəməxsusluq problemi”, Əməkdar İncəsənət Xadimi, sənətşünaslıq doktoru, professor İmruz Əfəndiyeva “E.Abasovanın elmi-nəzəri yaradıcılığı”, Əməkdar İncəsənət Xadimi, fəlsəfə elmləri doktoru, professor Gülnaz Abdullazadə “Azərbaycan musiqi elmində E.Abasovanın ardıcılları”, sənətşünaslıq namizədi, professor Ülviyyə İmanova “E.Abasovanın pedaqoji fəaliyyəti” mövzusunda məruzələrlə çıxış etmişlər.
Elmira Əbdül Həmid qızı Abasova 1932-ci il yanvarın 10-da Bakıda anadan olmuşdur. 1955-ci ildə Azərbaycan Dövlət Konservatoriyasının musiqişünaslıq ixtisası üzrə bitirmiş və həmin ildən ömrünün sonunadək konservatoriyada pedaqoji fəaliyyət göstərmişdir. Bu müddət ərzində E.Abasova onlarla məzun-musiqişünas, 8 sənətşünaslıq namizədi yetişdirmişdir. 1962-ci ildə Moskvadakı Ümumittifaq Sənətşünaslıq İnstitutunda “Ü.Hacıbəylinin opera və musiqili komediyaları” mövzusunda namizədlik dissertasiyasını müdafiə etmişdir. 1977-1991-ci illərdə Azərbaycan Dövlət Konservatoriyasının rektoru vəzifəsində çalışan E.Abasovanın təşəbbüsü ilə 1984-cü ildə Ş.Məmmədova adına opera studiyasının inşası başa çatdırılmışdır.
E.Abasova 1958-ci ildən ABİ-nin üzvü, 1962-ci ildən ittifaqın musiqi tənqidi bölməsinin sədri, 1975-1999-cu illərdə bu qurumun katibi, o cümlədən SSRİ Bəstəkarlar İttifaqı İdarə Heyətinin üzvü olmuşdur. O, Azərbaycan Bəstəkarlar İttifaqı və SSRİ Bəstəkarlar İttifaqının qurultaylarında, plenumlarında, həmçinin də müxtəlif ölkələrdə keçirilən konqres, simpozium və tribunalarda dəyərli məruzələrlə Azərbaycan musiqi elmini ləyaqətlə təmsil etmişdir.
Görkəmli musiqişünas alim Elmira Abasovanın əməyi dövlət tərəfindən həmişə qiymətləndirilmişdir. O, Azərbaycan Respublikasının Əməkdar İncəsənət Xadimi, “Qırmızı Əmək Bayrağı” ordeni və medallarla təltif edilmişdir.
Elmira Abasova 2009-cu ildə vəfat etmişdir.
Konfransda tanınmış vokalçılar - beynəlxalq müsabiqələr laureatları Fəridə Məmmmədova Qara Qarayevin “Mən səni sevirdim”, “Gürcüstan təpələrində” romanslarını, Fərid Əliyev Ü.Hacıbəylinin “Koroğlu” operasından “Koroğlunun ariyası”nı ifa etmişlər. Həmçinin tədbir iştirakçıları tanınmış pianoçular - Əməkdar Artist Yeganə Axundovanın, Əməkdar İncəsənət Xadimi Ülviyyə Hacıbəyovanın ifasında Cövdət Hacıyevin piano üçün “Ballada”, Soltan Hacıbəylinin “Gülşən” baletindən“Adacio” (piano üçün işlənmə) əsərlərini dinləmişlər.
Bölmənin digər xəbərləri
