MƏDƏNİYYƏT
GÖRKƏMLİ SƏNƏTKARA HƏSR OLUNMUŞ ELMİ-NƏZƏRİ KONFRANS
Sentyabrın 5-də Bakı Musiqi Akademiyasında görkəmli Azərbaycan müğənnisi, SSRİ xalq artisti Müslüm Maqomayevin 60 illik yubileyinə həsr olunmuş elmi-nəzəri konfrans keçirilmişdir.
BMA-nın rektoru, xalq artisti, professor Fərhad Bədəlbəyli konfransı açaraq, görkəmli sənətkarın həyat və yaradıcılığından danışdı. Onun 60 illik yubileyinin keçirilməsi haqqında Azərbaycan Prezidenti Heydər Əliyevin Sərəncamını mədəniyyətimizə və incəsənətimizə göstərilən böyük qayğının təzahürü kimi dəyərləndirdi.
Akademiyanın prorektoru, fəlsəfə elmləri doktoru, professor Gülnaz Abdullazadə, Bəstəkarlar İttifaqı İdarə heyətinin birinci katibi, xalq artisti, professor Vasif Adıgözəlov, sənətşünaslıq namizədi, professor İmruz Əfəndiyeva və başqaları çıxış edərək, musiqi sənətinin inkişafında M.Maqomayevin və mənsub olduğu ailənin müstəsna rolundan ətraflı söhbət açdılar, onu dünya şöhrətli müğənni kimi səciyyələndirdilər.
Sonra xalq artisti, professor Lütfiyar İmanov görkəmli sənətkarla bağlı xatirələrini söylədi və mahnılar ifa etdi.