Göyçay, Ağdaş, Mingəçevir və Qəbələdə prezident seçkilərinə start verilib
Göyçay, 11 aprel, Şahnəzər Bəşirov, AZƏRTAC
Aprelin 11-də respublikamızın hər yerində olduğu kimi, Mingəçevir şəhərində, Göyçay, Ağdaş və Qəbələ rayonlarında da Azərbaycan Respublikasının prezidenti seçkiləri keçirilir.
AZƏRTAC-ın bölgə müxbiri xəbər verir ki, həmin şəhər və rayonlarda fəaliyyət göstərən seçki məntəqələri səhər saat 8:00-da öz qapılarını seçicilərin üzünə açıb. Səsvermənin azad, demokratik və şəffaf keçməsi üçün bütün məntəqələrdə lazımi şərait yaradılıb, seçki məntəqələri zəruri texniki vasitələrlə, o cümlədən mürəkkəb balonları və ultrabənövşəyi lampalarla təchiz edilib.
Bölgə üzrə 5 seçki dairəsinin 40-dan çox seçki məntəqəsində veb-kameralar quraşdırılıb. Məntəqələrdə səsvermənin gedişini müxtəlif siyasi partiyalar və qeyri-hökumət təşkilatlarını təmsil edən yerli, habelə nüfuzlu beynəlxalq təşkilatlardan olan çoxlu sayda beynəlxalq müşahidəçi izləyir. Dairə seçki komissiyalarından verilən məlumata görə, səsvermə başlayan vaxtdan bölgə seçiciləri ölkəmiz üçün mühüm əhəmiyyət daşıyan bu siyasi kampaniyada çox fəal iştirak edirlər. Səhhəti ilə əlaqədar seçki məntəqəsinə gələrək səsvermədə iştirak edə bilməyən vətəndaşların yaşadığı evə daşınan seçki qutuları aparılır və onların seçkidə iştirakı təmin edilir.
88 saylı Göyçay seçki dairəsi dairə seçki komissiyasının sədri Eldəniz Həmidov qeyd edib ki, dairənin tərkibinə daxil olan 43 seçki məntəqəsi üzrə 41 min 260 seçici qeydiyyata alınıb. Onlardan 921-i ilk dəfə səs verən gənclərdir. Həmçinin başqa yerdə səs vermək istəyən 202 nəfər seçiciyə qeydiyyatdan çıxma vəsiqəsi verilib. Məntəqələrin 5-də veb-kameralar quraşdırılıb. Seçkilərin gedişini 478 nəfər yerli müşahidəçi izləyir. “Rəy” Monitorinq Mərkəzi tərəfindən 8 seçki məntəqəsində “exit-poll” keçirilir.
89 saylı Göyçay-Ağdaş seçki dairəsi dairə seçki komissiyasının sədri Nizam Məhərrəmov bildirib ki, 36 seçki məntəqəsi üzrə 39 min 661 seçici qeydiyyata alınıb. Seçki məntəqələrindən 17-si Ağdaşda, 19-u isə Göyçayda yerləşir. On iki seçki məntəqəsində veb-kameralar quraşdırılıb. Seçicilərin 398 nəfəri səsvermədə ilk dəfə iştirak edir. Bundan əlavə, 147 nəfərə qeydiyyatdan çıxma vəsiqəsi verilib. Səsvermənin gedişini 369 nəfər yerli müşahidəçi izləyir. Həmçinin beynəlxalq müşahidəçilər, ATƏT-in Demokratik Təsisatlar və İnsan Haqları Bürosunun rusiyalı nümayəndəsi Pyotr Yakmenel və ABŞ-dan olan Keyts Barbara seçki məntəqələrində səsvermə prosesini izləyirlər. “ELS” Müstəqil Araşdırma Mərkəzi tərəfindən seçki məntəqələrində “exit-poll” keçirilir.
90 saylı Ağdaş seçki dairəsi dairə seçki komissiyasının sədri Nürəddin Babayev isə qeyd edib ki, dairə üzrə 40 seçki məntəqəsində seçicilərin ümumi sayı 40 min 400 nəfərdir. Onlardan 586-sı ilk dəfə səs verənlərdir. Ağdaşın 137 sakini səsvermədə iştirak etmək üçün qeydiyyatdan çıxma vəsiqəsi alıb. Məntəqələrin 10-da veb-kameralar quraşdırılıb. Səsvermənin gedişini izləmək üçün 451 yerli müşahidəçi qeydiyyatdan keçib. Rayonda yaşı 100-dən yuxarı olan 6 nəfər seçici var. Ağdaşda seçki prosesini ATƏT-in Demokratik Təsisatlar və İnsan Haqları Bürosunun müşahidəçiləri, almaniyalı Broser Edqard Josef və norveçli Naus Gumhild Amett izləyirlər.
Səsvermənin ilk saatlarında yüksək seçici fəallığının qeydə alındığını deyən 47 saylı Mingəçevir seçki dairəsi dairə seçki komissiyasının sədri Oqtay Məmmədov dairə üzrə 30 seçki məntəqəsinin fəaliyyət göstərdiyini vurğulayıb. Bildirib ki, seçki məntəqələrinin 12-də veb-kameralar quraşdırılıb. Qeydə alınmış 37 min 490 seçicinin 408 nəfəri bu gün ilk dəfə səs verəcək gənclərdir. 239 nəfərə qeydiyyatdan çıxma vəsiqəsi verilib. Səsvermənin gedişini 325 nəfər yerli müşahidəçi izləyir. Mingəçevir şəhərindəki seçki məntəqələrində Vətəndaş Cəmiyyəti Uğrunda Müstəqil Məsləhət və Yardım Mərkəz tərəfindən bir, “ELS” Müstəqil Araşdırma Mərkəzi tərəfindən 3 seçki məntəqəsində “exit-poll” keçirilir. Şəhərdə seçki prosesini ATƏT-in Demokratik Təsisatlar və İnsan Haqları Bürosunun müşahidəçiləri Baskin Aleksandr, Vinnurov İrek, Smetanikov Sergey müşahidə edir.
116 saylı Qəbələ seçki dairəsi dairə seçki komissiyasının sədri Ramiz Əsədov isə bildirib ki, 54 seçki məntəqəsi üzrə 43 min 743 seçici var. Onların da 579 nəfərinin yaşı 80-dən yuxarıdır. 980 nəfər səsvermədə ilk dəfə iştirak edəcək gənclərdir. Səsvermə prosesinin internet vasitəsilə onlayn izlənilməsi üçün 10 seçki məntəqəsində veb-kameralar quraşdırılıb. Hazırda səsvermə seçicilərin fəallığı şəraitində keçir.
Bölmənin digər xəbərləri
