Göyçayda qanvermə aksiyası keçirilmişdir
Göyçay, 20 avqust (AZƏRTAC). Göyçay rayonunda növbəti qanvermə aksiyası keçirilmişdir.
AZƏRTAC xəbər verir ki, Səhiyyə Nazirliyinin tədbirlər planına uyğun olaraq Göyçay Mərkəzi Rayon Xəstəxanasında keçirilən xeyriyyə aksiyasına səhiyyə və təhsil işçiləri, icra hakimiyyətinin, idarə və təşkilatların kollektivləri, hüquq mühafizə orqanlarının əməkdaşları, yanğınsöndürənlər və gənclər həvəslə qoşulmuşlar.
Müxtəlif qan xəstəliklərindən əziyyət çəkənlərə köməklik məqsədilə keçirilən tədbirdə B.Eyvazov adına Elmi-Tədqiqat Hemotologiya və Transfiziologiya İnstitutunun Mərkəzi Qan Bankının əməkdaşları qan vermək istəyən vətəndaşları əvvəlcə müayinə etmiş və onlara məsləhətlər verərək aksiyaya hazırlamışlar.
Göyçayda ildə bir neçə dəfə keçirilən digər qanvermə aksiyaları kimi, bu tədbir də yüksək səviyyədə başa çatmışdır. Könüllü qan vermək üçün xəstəxanaya müraciət edən 150 nəfərdən ümumilikdə 60 litr qan götürülmüşdür.
Tədarük olunan qan və qandan hazırlanan preparatlardan hemofiliyalı və talassemiyalı, həmçinin qana ehtiyacı olan digər xəstələrin müalicəsində istifadə ediləcəkdir.
Bölmənin digər xəbərləri
